【日本遊源地】要潤＠香川縣 最愛食讚岐烏冬輕鬆踩單車環島遊
日式烏冬集團丸龜製麵收購「本地薑」譚仔米線近日成為城中熱話，講到日本著名的讚岐烏冬，其實產自香川縣，近年更以「烏冬縣」自居，出身於當地的型格男星要潤還被委任為「烏冬縣副知事」作推廣。
36歲的要潤生於香川縣三豐郡三野町（2006年統稱為三豐市），身高185cm的他在學生時代是一名跨欄選手，未有繼續運動員生涯而轉戰演藝圈，2001年拍攝《幪面超人Agito》一舉成名，因為跟台灣男星藍正龍撞樣，令港台觀眾對他亦有所認識。要潤從影17年雖然大多是出演配角，不過身材高大又輪廓分明讓人留下深刻印象，於大河劇《龍馬傳》、《花燃》、《掟上今日子的備忘錄》、《下剋上應考》等熱播日劇都見其身影。
要潤多年來為家鄉香川縣擔任觀光大使，又為描寫該縣名所及名產的動畫《烏冬之國的金色毛鞠》（うどんの国の金色毛鞠）擔當預告旁白，到當地旅行總見到他的海報在左近。而香川縣當然唔止得烏冬，想知更多關於要潤的特色遊點？睇落去啦！
手掌咁大天婦羅
要潤在「烏冬縣」土生土長，細細個就食烏冬大，他由學生時代已愛幫襯三豐市的「手打うどん 渡辺」，就算在東京生活多年，返到老家都不忘去食番碗，該店最出名是有非一般的天婦羅，炸蝦炸到葉子形狀，單是賣相已夠呃like，型男推薦得味道當然無得輸。香川縣有過千間烏冬店，旅客亦可搭乘「烏冬的士」搵食，每位司機都熟路及受過嚴格訓練，只要講出要求就能搵到心頭好烏冬！
地址：三豐市高瀬町下勝間2552
交通：JR「高瀬」站步行13分鐘
單車漫遊三豐市
食完天婦羅就要遊一遊要潤故鄉，他出生的三豐市是在香川縣西邊的鄉村小鎮，知名度可能未及高松市、丸龜市，當地以浦島太郎傳說及紫雲出山而聞名，民風純樸及有自然靚景，當地觀光協會更提供電動單車租借服務，單車可輕鬆上落坡，喜歡睇海追尋浦島太郎可在莊內半島環島一圈，山系人士就可到紫雲出山親親大自然。單車4小時租金1,000日元，全日租金1,500日元，好抵玩。提提你，租借時必須出示身份證明文件，以及逢星期二休息，想踩單車遊島要注意。
地址：三豐市詫間町詫間1338-127
交通：JR「詫間」站轉乘巴士10分鐘
小豆島橄欖公園
要潤除了熱愛讚岐烏冬，亦曾示範用家鄉小豆島的名產橄欖油炮製美食，小豆島是瀨戶內海第二大島，也是全日本唯一的橄欖產區，島上的橄欖公園展示出各品種橄欖，附設的香草庭園則種植了130多種的草本植物。館內除了售賣食用橄欖油，亦有護膚品及橄欖雪糕；園區內有個大大的希臘風車，影靚相打卡就係指定動作。
地址：小豆郡小豆島町西村甲1941-1
交通：高松港坐船到小豆島土庄港再轉乘巴士到達