【東京迪士尼】50億打造《海底奇兵》新潛艇　中村杏透視裙撐Mo仔

大熱動畫《海底奇兵》的尋親記受全球觀眾歡迎，萌爆「Mo仔」（Nemo）跟一班海洋朋友人氣高企，日本東京迪士尼海洋（Tokyo Disney Sea 簡稱：TDS）以此為題打造全新設施「Nemo & Friends SeaRider」（ニモ&フレンズ・シーライダー），新遊戲今日正式對外開放，為系列動畫配音的模特兒中村杏（中村 アン ）、搞笑藝人木梨憲武、資深演員上川隆也及室井滋今早現身造勢，跟240名入場觀眾握手。

索模中村杏以白色透視連身裙騷招牌靚腳登場，她跟3位拍檔承接動畫配音重任，聲演SeaRider中的3D動畫，一場去到當然先玩先享受，試玩後都大讚過癮，指適合大人小朋友同樂，仲話聽到拍檔配音好開心。木梨憲武稱前後玩了3次，搞笑指自己55歲都玩到好high好過癮，上川隆也唔輸蝕話自己同樣過了50歲，玩完都覺得好滿足，猶如置身海洋世界。

注意！海洋老友埋伏

樂園斥資50億日元（約3億4千萬港元）打造這項新設施，潛水艇SeaRider號共有兩台，每次分別可載122人，遊客可深入水底跟Mo仔及一班海洋朋友見面，歷時5分鐘的旅程一定相當有趣。今日開幕唔少日本網民都有到場打卡，縱觀排隊需時45分鐘至2小時，玩後感正評居多。溫馨小提示，現場周邊商品當然唔少得，設施附近更會埋伏各位海洋朋友，唔好漏咗佢哋呀！