【Morning娘舊將】後藤真希產後亮相極速修身 封最佳媽媽雪前恥
撰文：伍景欣
出版：更新：
日本媽媽協會主辦的「第10屆最佳媽媽獎」今日在東京舉行，31歲女團Morning娘舊將後藤真希產後首度公開亮相，以白色連身裙登場，她繼前年12月為圈外丈夫誕下大女，今年3月尾再誕下細仔，產後1個半月已極速回復fit爆身材，認真厲害！
後藤真希雖則好耐無唱歌，但以歌手身份出道的她獲選音樂部門最佳媽媽；同場有為東山紀之誕下兩名愛女的木村佳乃、模特兒佐田真由美、花式溜冰金牌得主荒川靜香等，分別為藝能、文化及體育部門得主。
後藤真希直言產後復出好緊張，在台上分享湊仔經，透露細仔經常飲完奶後會喊及嘔奶，餵奶過程無限loop。她稱同時照顧兩名子女雖然好辛苦，又經常冇覺好瞓，不過每天都過得好幸福。
回一回帶，後藤真希前年誕下囡囡後，曾冒大雪抱住當時只得1個半月大的b女外出，並公開母女一起看手機的合照，網民當時狂插她唔識湊女，罔顧嬰孩安全等；她在懷第2胎時染髮及電髮轉新look，外界亦指摘染髮劑隨時會由頭皮吸收進入體內，對胎兒造成不良影響。真希這次獲選最佳媽媽，無疑是為其育兒之路打了支強心針， 自認新手媽媽的她領獎時也稱不會輕易服輸，會加倍努力照顧小朋友，無愧這個獎項。
兩度力保性感身材
作為Morning娘全盛時期一員，後藤真希向來以身材火辣見稱，未做人母前不時性感示人，榮升媽媽後都保持住苗條身段。她上月透露由均衡飲食入手，產後3星期已減磅8公斤；早年誕下首胎女兒後，亦曾展示過極速修身成果，當時她解釋指因湊女太辛苦，要餵母乳及日夜照顧女兒，晚晚瞓得3個鐘，過了10天就極速減磅7公斤，最佳媽媽果然唔易做。