黎明現身《29+1》？ 楊尚斌高純度扮聲 比李思捷扮得更神似
瞌埋眼聽，係咪以為黎明今夜會來呢？其實今次以高純度神演Leon的，是最近上畫電影《29+1》內的男配角楊尚斌（Ben），戲中他飾演周秀娜男朋友，其中一幕為逗女朋友歡喜，扮起黎明唱《對不起，我愛你》，笑爆全場，完場時大家都好想知到底呢位朋友係邊位？世上竟然有人比李思捷扮黎明扮得更神似？香港01就搵到Ben做訪問，除了扮Leon講金句，再一城唱多首《願你今夜別離去》俾大家聽。
Ben Yeung數年前是跳舞組合Bro5 成員之一，偶然下獲彭秀慧賞識演《29+1》舞台劇，更參與電影版。其實好幾年前，你都會聽過Ben唱歌，唔係話你有聽Bro5，而是當時他曾經扮Leon把聲唱出惡搞神曲《如果李慧琼》，贏得幾十萬人睇過笑過。可惜就一直得聲冇樣，今次終於可以真人亮相，俾大家認下把聲又認下個樣。
獲Mark Lui官方認證
問到練成扮Leon的技倆，全因Ben成長於四大天王年代，亦成長於熱唱卡拉OK年代，去到K場，人人都會練定幾首飲歌在朋友間一展所長。「自己把聲偏沉，唱學友的歌有難度，所以較喜歡選唱黎先生的歌，可以直接用原Key唱會舒服些。」原意只是想在朋友面前露兩手，但漸漸被友人發現他唱得極神似，於是開始細心研究，刻意摹倣，終於掌握到一套竅門。「起初會猛加鼻音，但慢慢就知黎明把聲其實不是純粹重鼻音，反而輕輕帶過會更似。」
Ben Yeung把聲似黎明，不是今日才知道的事，早在97年就已被發現，當年新城電台同加州紅合辦一個《全港至like黎明模仿大賽》，由雷頌德和黎明做評判，結果贏得冠軍。「有幸從黎明手中接過獎項，有登報紙呀，仲有剪存起來。」可惜到截稿前都未找得出來讓大家欣賞。問到當年是否單靠神似就贏得冠軍，Ben坦言唔止。「因為15歲開始有學跳舞，所以在唱《友情天地》（國語）時加插打觔斗舞步。」聽落都幾奇招，但最緊要評判受，雷頌德更給予他一句評語︰「聲底好，繼續加油！」
4年前的《如果李慧琼》
雖然贏得冠軍，但隨後就似沒事發生過，更冇因而加入樂壇成為黎明二號，至於聲線似一事，亦只是圍內人知道。直至2013年，填詞人梁柏堅有晚致電給他，說有首歌想他以黎明聲演繹，這首就是曾經在網上瘋傳一陣子的《如果李慧琼》。「印象中有廿幾萬人次看過，亦有傳媒找我做訪問。」不過隨後又好似陣風咁，吹完便靜下來，直至遇上彭秀慧，遇上這個角色，又漸漸有起色。而令人難以置信是，原來今年是Ben入行第17個年頭，期間的高低起跌實在有血有淚。
想知這位「黎明」17年來的娛樂圈血淚史，請留意下一則專訪。