【不懂撒嬌的女人】學美劇玩第二季 編審朱鏡祺：想要後生觀眾
撰文：林通賢
出版：更新：
美劇一向以季度作單位，想不到《不懂撒嬌的女人》原來都學美劇一樣，玩季度性，第一季就在14集(本週日14號)完結，是不是好快結局呢？之後就要等新一季了，不過眾所週知，美劇一季要等半年，但無綫知大家好心急，所以《不》劇就等得快一點……只須等23小時，無錯，是23小時，因為第二季就是第15集，不要噓住！不是標題黨騙觀眾入來看文，而是編審朱鏡祺透露的，加插季節概念，是他希望《不》劇比以前的無綫劇更緊湊…..
朱鏡祺說：「𠵱家嘅劇本要求，係睇三、四場戲已經好想追，觀眾先會鍾意睇，我哋想攞多啲後生觀眾返嚟，佢哋節奏好快，我將20集嘅內容濃縮到14集左右，我哋呢套28集啦，其實係分咗兩個season嘅感覺，頭14集已經好大結局，觀眾睇第14集已經覺得嘩！咁大嘅高潮，去到咁盡嘅場面呀？好似咩都做哂咁款喎….但係14集咋，就好似以前20集咁嘅內容，觀眾會以為睇完架喇？但其實15集又開始，於是就會有season 2嘅感覺，迪士尼嘅故事就係講到公主皇子一齊快樂生活就完，但我哋呢個現代故事，皇子公主係點樣生活呢？會遇到咩困難？係埋一齊係咪一定開心？解決之前嘅事係咪以後冇事發生？頭14集觀眾會發現，時空好壓縮，頭14集講幾個月嘅故仔，15集打後係講緊幾年嘅故仔，係同以前大家睇嘅無綫劇好唔同。」編審果然係編審，講到人好想睇15集喎……