【不懂撒嬌的女人】王浩信演暖男係好戲　推到年尾成視帝大熱　

王浩信(Vincent)上年憑《EU超時任務》飾演渠頭一角而被網民捧成視帝大熱，雖然最後只與同劇的朱千雪一同獲得「最受歡迎劇集搭檔」，視帝寶座則飲恨於同樣是大熱劇集《城寨英雄》的陳展鵬，不過佢喺TVB馬來西亞和星和頒獎禮都拎返個最喜愛TVB電視角色，但網民們依然替他不值。直到剛剛《不懂撒嬌的女人》播出後，Vincent飾演程日暉(Saving哥)一角大受歡迎，視帝呼聲又再掀起。

在該劇中，Saving哥是一個市井之徒，雖然開咗間公司，但就欠債累累。不過每個男人背後都有一段深刻嘅感情，佢都唔例外，呢幾集佢開始回顧返以前嘅情史。平時做一個貼地嘅裝修佬，演出極之自然，完全無違和感，而且講嘢方式夠市井夠搞笑，演繹手法之好立即將其他演員比落去。當然今次咁出位，角色設它都幫咗佢唔少，就好似上一套劇嘅渠頭一樣。今集佢呢個角色本來係背負住一段傷心嘅感情經歷，不過隨住個ex結婚就得到解放，當佢講起段感情時眼神就好像懂得做戲一樣，內疚、唏噓、傷心的感情標晒出嚟。隨住佢同唐詩詠嘅感情線開始浮面，而且佢仲係總經理林文龍唯一一個手下，相信之後都會有大把發揮。

其實喺呢兩套出位劇集之前，喺《樓奴》入面做樓耀明呢個角色都做得好出位，呢套劇係佢第一套做男主角，仲係第一次被提名「最佳男主角」。喺呢套劇之前其實Vincent都被提名過幾次「最佳男配角」，不過4次男配加埋2次男主都係食白果收場，最多都係拎吓啲豬肉獎，你話佢無演技咩？唔係呀，大把人認同佢，尤其係一眾網民。你話佢唔落力咩？當年佢喺兩套劇入面加埋連續俾人摑足三十幾巴，打到連佢自己都話被人摑到顎骨移位，認真慘。你話佢唔努力咩？又唔係，作為男主角每年都有兩套劇出，算係咁喇。

睇返今年其他有力競爭對手，以播咗劇嚟睇，陳展鵬、鄭嘉穎、馬國明暫時都平平無奇，林文龍、羅嘉良、張兆輝唔似會玩頒獎禮，袁偉豪、洪永城未夠班，如果照住呢個勢，王浩信唔係話無機會。咁睇吓之後半年，蕭正楠有《翻生武林》同《超時空男臣》，陳展鵬有《同盟》，郭晉安有《老表，畢業喇！》，陳豪有《使徒行者2》，王浩信自己都仲有套《踩過界》。當然之後嘅劇仲未播，無人會知另外幾位男演員會有咩發揮，不過Saving哥以暖男呢個定位已經深入大眾人心，只要佢係下套《踩過界》繼續出色，相信會同上年一樣，都依然係男主角大熱。

除咗喺劇集做暖男，其實現實中Vincent都係一個暖男。同老婆陳自瑤生咗個囡囡之後，除咗拍戲之外嘅時間都俾晒屋企，仲不時會成家出去做運動，認真Sweet。其實自從06年出道之後，Vincent在工作上一路都順風順水，當年一首《愛妳便愛》成為K房熱門歌曲。演而優則唱的他，入TVB後雖然以男配角起步，不過角色依然得到觀眾的認可。直到呢兩三年終於擔正，今年亦好大機會連續三年入選「最佳男主強」最後五強，希望唔會再食白果喇！