【失眠．專訪 一】黃秋生談cult片好拍檔：係我令邱禮濤成為導演
撰文：鄺鈺瑩
出版：更新：
「黃秋生ｘ邱禮濤」被稱為本港cult片界神級組合，但秋生笑言表示不知什麼是cult，其實這對最佳拍檔由93年合力炮製出《八仙飯店之人肉叉燒包》後，秋生將變態角色發揮得淋漓盡致，令他初嘗影帝之味，提起這位導演拍檔，秋生即時眉飛色舞。「話佢令我拎影帝？明明係我自己能力去拎！係我令佢成為一個名導演就真。我們算是識於微時，如果唔係我幫佢拍畢業作品，佢能夠畢業？連導演都做唔到啦！」當然這番話是半講笑，但同時能看出兩個大男人是多麼友好。
秋生說當年就讀浸會學院傳理系畢業的邱禮濤，已經是長毛一名，四出了找演員拍自己的畢業作品，遇上了秋生。「佢一問我就話拍，你睇我幾有義氣！不過我真係很感謝佢，拍完之後，有日成班學生去佢屋企慶功，我當時看到書架上有本書是講戲劇的理論，我看完之後很感觸，講咗句：『如果好似你咁有學問就好。』佢聽後，靜咗一下話：『如果你比心機，你都可以。』」自此，秋生不停的閱讀和學習，而二人的默契亦愈來愈好，秋生說只要拍邱禮濤的戲，他一定是長期roll機，因為隨時有驚喜：「佢都知道的，就算嗌good take，都不會cut機，因為說不定我中槍之後會起返身。」
既然合作如此無間，問秋生對邱禮濤的劇本是否排在優先考慮之列，他卻笑說：「我無咩撈咋，有嘢就食……」談起邱禮濤，秋生幾乎沒一句認真，惟一要強調的就是他非常尊敬和感謝這位好友，真正的亦師亦友。
來到《失眠》，秋生與邱禮濤的合作會更加血腥無底線，想知道當中的拍攝過程，密切留意專訪下集。