【ViuTV詭探】酒店內燒溪錢引起住客不安？ 邵仲衡：誤會一場
撰文：鄺鈺瑩
出版：更新：
ViuTv新劇《詭探》快將播出，不過邵仲衡日前拍攝時就因為話試過喺拍攝現場（即酒店）進行燒溪錢、拜神等動作，搞到有關方面極為緊張，更表明：「如果在酒店範圍內進行「明火」是危險活動及違規，如果屬實，未來將拒絕ViuTv借場拍攝，因為酒店需確保客人安全為首要考慮。」好似好嚴重……不過，《詭探》監製Kevin就話絕無此事，而邵仲衡亦都表示係誤會一場：「我意思係呢套劇之前好多拜神情節，又點會於酒店內拜神？當日係拍緊安全屋戲份，根本用不着要拜神。而且酒店難得借出套房配合劇組拍攝，反而我們勁擔心整污糟地方為酒店帶來不便就真！」
現在拍劇，講求實境，所以ViuTv的劇組亦斥資6位數搭建了一座「警署」廠景，邵仲衡笑言拉「肥仔賢」劉錫賢入警局之後，不用大迫供已經可以令他馬上認罪。「現場收音唔開得冷氣，加上天氣悶熱，肥仔賢拍完一日都冇咗幾磅肥膏，所以導演一停機佢就攬住個冷風機係咁吹！」。
劇中飾演變態降頭師的劉錫賢，表示最辛苦是戴眼鏡做戲：「天氣熱我唔怕，最怕太熱眼鏡有霧氣變咗坤哥咁，大佬孝（邵仲衡）叫我今日當做高溫瑜珈，真係瘦到幾磅！不過聽佢講原來之前有酒店戲及九龍塘大宅咁高級場景，最衰冇我份！如果拍續集我一定向監製求角色由邪變忠，可以同佢地齊齊享受下。」