美魔女樊亦敏醒你天然養顏心得 反人造：有水腫唔會走去割眼袋
周不時都聽到有人呻：「做女人真係好煩呀！」除了煩幾時可以嫁得出，年年月月會煩惱的，就是如何保持自己外貌不老，身材不走樣。為了讓自己凍齡、逆齡，甚麼也好，女士都會窮盡一生尋找美顏秘技，上至明星推介，下至民間偏方，有錢有能力有時間的話，都會盡量嘗試，無所不用其極。剛巧，有美魔女之稱的樊亦敏，她以曾開過美容院的身份，向廣大女士分享護膚心得。上次就講到她不會為補水而狂敷面膜，還有如何夜晚肚餓忍唔住口食少少零食，都可以keep住唔肥。有心得當然唔好畀佢停，就向大家分享美魔女樊亦敏的養顏之道！
論美顏，樊亦敏表示絕不能只偏信一種方法，要了解自己的身體狀況，才能夠按體質需要，加以調理。她說：「我就有睇開中醫，知道自己寒底，咁就會開一啲藥方去畀自己行氣活血，但如果熱底呢，就唔得啦，所以知清楚自己咩體質好重要。」樊亦敏坦言自己有時會水腫，眼袋之類都會現形，她不主張整形，不介意效果慢，方法必定要天然，所以她還是選擇中醫：「我會去針灸，去消一消個眼袋，就唔會走去割眼袋，係就係慢啲，但起碼唔會係一下子刺激或影響到皮膚，彩光都好少做，要靚就係冇得急。」講到養好身子，樊亦敏表示有些老生常談最好就遵守：不煙、不酒、不喝凍飲，就算無辦法捱夜，都要食得清淡，而睇中醫的好處，就可以按體質需要，知道有甚麼食物吃過量會有反效果。
至於護膚，除了上次講過面膜要平躺敷外，樊亦敏表示：「其實都唔好用死某一隻護膚品，要根據天氣去轉一啲產品，因為用死一隻product耐咗，皮膚就會產生惰性，會冇感覺，效用自然唔大。咁磨砂呢啲深層清潔一樣要做啦，但都係嗰句，唔好過量啦。」樊亦敏之前就開過美容院，對養顏方法可謂暸如指掌，咁過往有冇哪一種產品真心好用呢？她就推介了來自西班牙的香薰牌子ALQVIMIA：「我之前開美容院，都有入個呢隻牌子嘅產品，知道佢都幾好用，有好好嘅紓緩功效。」翻查過資料，這個牌子創辦人師承有800年歷史的西班牙香料及化妝學校，以科學及天然提煉結合的手法研製產品，上網就可以買得到。相信女士們睇完都忍唔住去Google搜尋一下。