李嘉曾被武林高手上門挑機：同佢先打兵器再打拳腳

對於徐曉冬四處挑機，TVB武神李嘉已在facebook發戰書，亦就這件事，昨日接受《香港01》透露了自己練武心得和經歷；原來開武館的他，亦試過幾次被人踢館挑機，他說：「有啲真係上到嚟，撩我打，但我一見到佢帶住video我就行開㗎喇，冇帶嗰啲我真係同佢打，我會先同佢打兵器，打完就到拳腳……因為（武館）嗰陣喺尖沙咀開，打正旗號、夠薑上嚟，一係就好有實力，一係嗰腦有啲問題，好多呢啲人。」

原來「上嚟踢館」並不是電影、電視情節才出現，時至今日都發生，當然亦有不打不相識，他說：「以前我後生廿幾歲，喺網上約出嚟打嗰啲呢，大家打完爆缸又好，受傷又好，有啲真係friend咗，試過打完去重慶大廈食咖喱，但亦有人同我打完，話我奸茅，話我隻手做咩咁長？我話我隻手長，我阿媽生嗰喎，唔關我事，所以呢啲友（徐曉冬），將一件好小的功夫交流，拿來踩整個中國功夫，真係好離譜，同埋造作。」

如果有留意李嘉的faceboook，會發現他真的很愛武術，幾乎每一個post都和打功夫有關，他亦對中國功夫有一番見解，當然相信有不少網友和小編一樣未必了解中國功夫，會想像中國功夫又蛇形、又鶴形、有時起手式單腳企，面對MMA實戰衝埋身、應該冇得打啩？李嘉對小編這個迷思，亦有一番見解，他說：「中國功夫是有漏洞和弊端的……特別是摹倣動物形態的拳法，或者套拳，在我接觸少林寺或者其他一些好傳統的門派，我發現好多套拳，套拳就是由開式打到收式，自己一個人耍套拳出來，套拳的功能性呢，其實不是為了打，可以話是…..自娛模式，同跳舞差不多，第二樣嘢，有人話套拳是紀錄招式，但我的看法是，套拳係撚化啲門外漢，或者吸引初學學員，我要吸引人，我用什麼吸引呢？就用套拳將它神秘化，你學這套拳就交多幾個月學費啦。」

對於套拳李嘉就有一點看法，不過原來想學實戰，中國功夫亦有，他說：「真的實戰，致命的，其實是功法，如果個師父真的肯教你的話，中國功夫我一直都話練的不是招式而是功法，透過功法將一個人的身體加強、改變，這個改變是令人有攻擊性同埋抗打性，靈敏性；靈敏性不是西方指的彈跳力、敏捷度那些，中國功夫的靈敏性是練到我的手、我的身體、每一吋的肌膚都有個拼勁的能力，我透過同你打的過程，知道你的力去到邊，怎樣去化解你，或者再進攻，這個拼勁就是有些人所講的合埋眼練功、合埋眼打交。就係呢樣嘢。」李嘉還說好打的人身形和健身身形是不同的，那麼打得之人身形是怎樣的呢？而在他眼中李小龍最好打是哪個時期呢？愛武之人記着看下一則報道。