格鬥狂徐曉冬指李小龍屬業餘　李家鼎斥囂張：死冇對證講乜都得

內地MMA格鬥狂人徐曉冬，以10秒KO太極高手魏雷，令武術界議論紛紛，不但質疑太極的實戰成效，更因為徐曉冬的一番狂言，他回應網民提問時，指李小龍只是「武術推廣家、理論家，不是格鬥高手，充其量是業餘高手」，擺出一副「拳打太極、腳踢詠春」的態度，令一班小龍迷相當不滿。

說起李小龍的電影，功夫迷一定將《唐山大兄》、《猛龍過江》、《龍爭虎鬥》及《精武門》反覆看過多遍，皆認為李小龍出拳踢腿速度之快，勁力之猛，絕非只是一個武打演員，甚至可以說是一個偉大的武術家。李小龍生前好友李家鼎，對李小龍的武術推崇備至，他接受《香港01》訪問，「我都睇過條片，咁擂台好多規矩嘅，佢(徐曉冬)嘅size亦都大過對手，睇得出佢打慣咗，起碼係撲擊嗰吓贏咗人，佢有『排打』嘅基本功，即係捱得打，如果一兩吓搞佢唔掂，人哋咪打返你，就係咁簡單，MMA係咁㗎啦。」

李小龍的功架，凌厲眼神，出招時的咆哮，全部令影迷看得如痴如醉，甚至連周星馳也在自己的電影中，滲出對李小龍的敬意。但電影歸電影，真正在實戰上，李小龍又是否真的咁勁？李家鼎表示：「小龍真係好犀利。(如何看得出？)武術嘅快、準、勁3點，佢都練到，同埋當你都未出手，佢已經快過你啦，呢樣嘢好多人都公認。依家徐曉冬打贏咗一次，而李小龍又已經死咗幾十年，死冇對證，佢講乜都得啦。(覺得他不尊重李小龍？)我覺得佢囂張囉，今次贏咗唔代表一世都贏。」

李家鼎曾習詠春、空手道、泰拳及跆拳道，以他的專業眼光，若然李小龍跟徐曉冬生在同一時代，二人對打誰勝誰負呢？李家鼎斬釘截鐵的說：「實戰佢一定唔夠小龍打。我同你講，視乎你打交定上擂台，打交就冇限定邊啲位唔打得，上擂台就限晒位，一有唔對路，拳證要分開㗎嘛，所以打交、表演、上擂台係幾回事。」他補充說，就算真的上擂台，如果比磅數對方是兩個李小龍，可說是打贏打輸也不光彩。

李家鼎指李小龍不但有武術上的理論，實戰亦甚為了得，但如何可以證明呢？他表示：「羅禮士係佢徒弟，即係《猛龍過江》同小龍對打嗰個，佢係五屆世界冠軍(空手道)，點解佢都咁服李小龍呢？因為大家鬥快唔夠小龍快，佢隻手出咗一半，小龍已經到咗，功夫嘅嘢，快打慢之嘛。」星爺在電影《功夫》中，有一句經典對白「天下武功，無堅不破，唯快不破」，再一次滲出李小龍「快與勁」的武術影子，徐曉冬的狂言，是少看了天下英雄。