陳昭昭承認脾氣躁導致婚變：而家冇人養要靠自己

陳昭昭今日（20/3）現身銅鑼灣出席公司簽約儀式，昭昭透露即將開辦網紅直播訓練班，她說：「今屆係第一屆，亦都係我自己嘅媒體公司聯同內地公司一齊搞嘅。我諗首要做嘅事，就會捧紅咗自己先，始終疫情都困咗3年時間，我哋啲生意損失慘重，加上而家我係單身冇人養，變咗就要靠自己。我相信透過呢個課程，係可以幫到身邊嘅藝人朋友會多工開，及可帶動企業嘅業績。」

被問到會否搵個伴侶？昭昭笑言：「其實我係揀緊，身邊有好多，哈哈！（你要求好高？）我要求唔高，當然最緊要對方係單身，要錫我同對我屋企人好，但最緊要脾氣好。（你前夫脾氣唔好咩？）係我脾氣唔好，哈哈，因為我個人比較急躁，所以我想搵個脾氣好嘅，佢會容忍到我嘅，不過我唔係脾氣唔好，我只係個人比較急啫。（原來你嚇走咗你老公？）哈哈，你好衰嘅。（咁你會唔會改你脾氣？）我會改，我盡量集中精神去做啲生意，咁就唔會咁躁。」