汪明荃唔期望情人節羅家英會送花：一定冇

汪明荃（阿姐）今晚（7/2）現身西九文化區戲曲中心大劇院出席粵劇新「胡不歸」頭場。提到情人節同羅家英將會如何慶祝？阿姐笑言：「其實都冇乜話會點慶祝都係咁過。因為過年前都好似玩咗好多嘢。（每年情人節冇預期佢會送禮俾你？）唔會預期佢會送嘢俾我，因為平時如果見到有需要嘅嘢都會買，就冇咩特別。（有禮物收唔會開心啲咩！）可能你對你女朋友好啲。（可能到時會收到花呢！）冇呀，送花好少。（你真係唔想家英哥送花俾你咩？）唔使喇。（有冇送過99支玫瑰俾你？）冇呀，一定冇。（咁我哋叫佢送俾你！）唔好呀，嘥錢。（都係用佢啲錢啫！）都唔好喇。」