蘇施黃完成最後一次化療迎68歲生日 曾暴瘦十磅：屙嘔11日
撰文：洪曉璇
出版：更新：
本月中踏入68歲的蘇施黃，去年10月自揭患上大腸癌第三期，隨即開始接受化療，積極面對病魔下，蘇施黃已完成最後一次合共4次化療，並在網上與大家更新近況。
不少癌症病人做化療電療都有副作用，蘇施黃在病房拍片仍相當精神，並分享幾次化療以來感受：「第一次化療都OK，第二次最慘入院住咗7日，前後夾埋屙嘔咗11日，記得入院時134磅左右，到出院只剩124磅，連金小姐（金燕鈴）都驚。好在過幾日食返嘢都好快回復磅數。第3次做化療就醒啦，完咗都繼續食止嘔藥，點知又嚟料有新嘢，啲皮膚非常乾，直情除衫時啲皮屑粉飛一樣，腳摸落去好鞋好乾，搽極CREAM都無用。」
即使治療再辛苦，蘇施黃都樂觀面對，原來全受一位已故好友影響：「大部分午餐都係自己煮，又會出去打波，起碼心理上話俾自己知無事。有位朋友曾患8次癌症，我喺佢身上學到好多嘢，唔好問點解會病，點解發生喺自己身上，同埋從不抱怨半句。好似朋友咁佢嘅精神、經歷，教識我地好多，好似食標靶藥唔好直接放入口，用麵包夾住食唔會爛口，我自己就無爛口但就麻痺，食嘢唔太食到味道。」