新聞女郎｜高海寧續約後頭炮　與佘詩曼激鬥演技：唔敢當

高海寧（高Ling)今日（19/1）現身長沙灣社區中心出席《高「齡」賀歲展關懷2023》探訪活動。提到去年動筆續約無綫後備受力捧，有傳她擔正3月開拍的新劇《新聞女郎》，與視后佘詩曼一較高下大鬥演技。

高海寧接受《香港01》訪問時親口證實，3月份會為新劇開工：「話我同阿佘大鬥演技我唔敢當，佢係我學習嘅對象。因為佢真係好叻，我試過遇到有啲角色唔識點做，我係會問佢意見，而每一次佢都俾到一啲好嘅意見我，令我更容易掌握到當中嘅需要，咁所以最開心嘅事就係可以再同佢合作，始終我哋都隔咗成7年嘅時間再次碰頭，咁我可以借機問佢我有冇進步。（有傳呢套劇係為你度身訂造！）應該唔係嘅，我知大家好錫我，大家都希望公司會特登安排啲劇俾我，我諗公司佢哋收到啦，佢哋知㗎啦。」

對於有指楊茜堯因劇本不合而推辭。高Ling表示：「我冇聽過呢個消息，喺兩個月前接呢套劇嘅時候，係見過監製，咁所以嗰陣時先知，變咗之前嘅嘢我係唔知。」