【心理追兇】曹永廉係王君馨親大哥　讚劇集成功：幫到好多演員

無綫劇《心理追兇Mind Hunter》，由飾演心理學家的馬國明，協助警方破案，但他能醫不自醫，經常出現亡妻的幻覺。該劇以懸疑驚嚇，氣氛詭異為主，但連串凶案的兇手，矛頭早已經指向王君馨，甚至連Final Boss是誰，對於聰明的網民可謂完全無難度，紛紛估計幕後黑手正是心理學家曹永廉。

曹永廉接受《香港01》訪問，對於不少網民估計他是幕後黑手，他笑言：「我都係臨尾客串嘅啫，戲分主要都係同君馨嘅，佢係我親阿妹吖嘛，至於我係咪Final Boss？其實好多人一早估到。套劇OK嘅，收視口碑都幾好。」該劇兇案未必精心設計，但每個單元也有讓綠葉配角發揮的空間，弒母案的何遠東，易服癖的阮政峰，連曹永廉也讚不絕口。

他表示：「依家梗係睇好阿東啦，其實我哋一直都好欣賞佢，佢個人好乖，好默默耕耘。我哋每一個人，包括我自己，都係差一個機會，其實公司都好多人俾心機，今次機會嚟到又食正佢，身邊所有同事都戥佢開心，呢套劇好好，幫到一個咁用心嘅演員。老實講阿東一個咁有實力嘅演員，一個角色就會幫到佢，所以俾大家睇到，每一個同事都唔好灰心。」

其實曹永廉說自己在等機會，也只是謙虛之言，他在星期一至五，由下午茶時段重播的《大太監》，9時半黃金檔的《心理追兇Mind Hunter》，至深宵時間重播的《妙手仁心II》，也會見到他的影蹤，最厲害是曹永廉外貌廿年如一日，仿如吃了防腐劑。不說不知，原來他也有過捱更抵夜的日子，在拍攝《寒山潛龍》及《守業者》，就試過連續開工40多小時，能夠保持青春，確實相當難得。

他表示：「其實真係純粹好彩，咁近呢一兩年都會做啲護膚、面膜咁，有時真係放通宵、半夜，食無定時，食公司嘢都唔會特別有益㗎啦。(平日會做運動？)我懶呀，一啲運動都冇，如果嗰排肥咗，咪減吓口囉，有時甚至唔食飯，但都要食嘢嘅，如果完全唔食，一食返就更易肥。食啲簡單啲嘅嘢，唔好咁肥膩囉。」其實《心》劇誰是Final Boss已經呼之欲出，但能夠看到一班綠葉的努力，已是最成功的地方。