「宅男女神」蘇皓兒與陳安立踩單車遊日本犧牲大：曬到膊頭有雀斑

「宅男女神」蘇皓兒（Chloe）最近聯同好友陳安立為ViuTV綜藝節目《單車踩爆日本》擔任主持，二人憑着一雙腿、兩條車胎走訪日本鳥取與和歌山，帶領觀眾以全新角度欣賞日本景點。首次拍攝綜藝節目的蘇皓兒，表示向來喜歡運動，難得可以寓工作於娛樂，坦言未出發先興奮，不過拍攝過程中，她亦遇上不少挑戰，除了體能上的考驗外，亦要犧牲色相，皆因連日踩單車暴曬，既令肌膚變黑，就連膊頭亦曬到出雀斑。

因疫情關係，蘇皓兒已近三年未有出埠，難得今次可以到日本拍攝，她表示十分興奮：「第一次參與綜藝節目拍攝，感覺同拍劇好大分別，因為旅遊節目好多嘢都冇得準備，好多事情要即場發揮，好考隨機應變同執生能力。」過往去旅遊，蘇皓兒主要乘搭交通工具，今次拍攝初嚐單車自駕遊滋味，她亦非常享受：「踩單車可以慢慢欣賞沿途風景，不過頭兩日踩單車對我嚟講有啲困難，雖然平時我有踩單車，但今次第一次喺公路、山路度踩，好考驗體力同膽量，有時候經過隧道，啲大貨車喺身邊，感覺都好刺激。」

難忘雨點迎面拍打

為了今次拍攝，蘇皓兒事前特別接受負重訓練及體能訓練，而拍攝過程中，她表示最難忘冒雨踩單車：「旅程中有一日落雨，但嗰日要踩嘅路係落斜，全個行程最大挑戰，又凍又濕，啲雨打埋身幾乎睜唔開眼，好辛苦，當中都有少少受傷，好彩之後雨過天晴，仲見到好靚嘅風景，即刻覺得咩都值得。」

問到今次以單車自駕遊可有令美腿變粗？蘇皓兒表示：「雖然日日踩單車，但唔覺得對腳粗咗，反而覺得曬黑咗好多，本身帶咗好多唔同款式嘅衫去換，但最後都長期着外套，因為發覺曬到膊頭有啲雀斑。」