【城嫂方媛】親密戰友小美見傳媒　陪住城城大：無問係咪雙喜臨門

一度被封為「鑽石王老五」的51歲郭富城，今日終於迎娶29歲的內地嫩模方媛（Moka），在半島酒店擺酒，一代天王正式封盤。城城的皇牌經理人小美大約7時15分出來會見傳媒，代新郎講話，講了大約9分鐘。小美就解釋今次城城低調辦婚禮，是十分堅持，只是預了家人、好朋友、工作團隊參與婚禮，因為想大家專注在他的公事上。不過對於人生一大喜事，城城都是會緊張，但小美感覺對方比想像中輕鬆。

小美表示陪住城城長大，眼見他如今真的成家立室，都替對方高興；只不過一班兄弟在現場太過搞笑，氣氛好輕鬆，所以城城結婚咁大件事，小美都冇喊。總括來講，整個婚禮都好輕鬆，沒有玩新郎環節，不過就做足所有結婚的儀式，又有送金器畀新娘，小美表示除了男方有準備金器，工作團隊都有送小小金器當作心意。

問到今次城城是否奉子成婚，小美就矢口否認：「佢絕對唔會，佢有呢個決定係因為都咁大個啦，都係時候要成家立室。」記者再三追問是否雙喜臨門，小美表示：「我冇問啊，真係冇問。（係咪BB 未夠3個月唔講得？）會唔會咁嘅可能呢，我真係唔知，但我承諾大家，知道一定會同大家講。」不過小美透露郭媽媽俾利市一對新人時，都有講過要開開心心，要努力造人。對於會否度蜜月，小美就話：「佢結婚之後就要開工，接咗兩套電影。如果要放假嘅，我盡量會俾佢放下啦，但唔會好多日，電影呢啲要mark期。」

小美多番講到婚禮都以簡單為主，所以婚禮rundown沒有太多花巧環節，但唔排除城城會唱歌俾老婆聽。小美只透露會在會上播放城城50歲時在半島慶祝生日，講起想成家立室的短片，同時都是城城今次在半島搞婚禮的原因。