仔仔一堂｜Andrew Carson已「分手」　真男友冇呷醋：攬攬哄返

無綫J2台同性戀配對真人騷《仔仔一堂》人氣最高之二的Andrew及Carson今日（27日）到灣仔宣傳寫真集，身為大學講師的Andrew笑指不覺人氣高了：「可能我啲學生都唔敢同我講，佢哋可能對呢個議題有少少Shy，都正常嘅。佢哋都唔係Surprised我參加呢個節目，因為佢哋都知我係Gay嘅。」Carson則指出街、健身都有人認得他。

兩人在節目中成功配對，談到戲外是否有真CP出現，Carson透露已同Andrew變回朋友關係，問是否有曖昧過，Carson害羞說：「我哋有一齊出街、食飯、睇日落，之後嗰啲唔講啦！」

Carson指沒有多了追求者，澄清是單身，他笑指：「啲人以為我同Andrew一齊，好多人祝福我哋，我一路都澄清返，我同Andrew做返朋友啦！」至於5個月前已「脫單」的Andrew指男友沒有呷醋：「佢冇講，但我Feel到佢有少少尷尬囉，我哋有一齊睇，解釋返佢知我諗法係乜。」他又指已攬攬哄回男友，而「前男友」Carson在旁則行開一步調侃道：「要保持距離！」