【全職沒女】陳松伶最初抗拒姊弟戀 被暖男老公攻陷芳心
雖然極老土，但有句說話不得不說：「天無絕人之路。」陳松伶2005年正值人生低潮，她毅然淡出香港娛樂圈，到內地發展，成為她與老公張鐸相遇的伏線。提起對方，松松變得滔滔不絕，說話語氣顯得放鬆，瞬間感受到她想起對方，不自覺流露出滿滿的愛意。
「我唔係一個戀愛大過天嘅人，如果唔係都唔會咁遲拍拖。加上當時都太忙，根本都冇時間拍拖。但我談戀愛嘅話，我就係look for一個long term嘅relationship。」如是者，張鐸的出現對松松來說，是始料不及的。不過，兩人發展下去，發現彼此想法都越來越近，慢慢地走到今天，來到第10個年頭。松松自言：「呢段愛情發生之後，一切都非常美好。」松松姐姐現在苦盡甘來，能遇上最適合的人，感到輕鬆自在，這個閃光彈放得令人心服口服。
張鐸雖然小松松姐姐8年，但性格、想法，甚至舉動都顯得相當成熟穩重，松松一度以為這個男人比她大幾歲。後來得知他比自己年輕，礙於傳統觀念，還有世俗眼光，松松最初不能接受，差點令戀情到此為止。可是兩人相處自然，想法接近：「佢份人好有責任感，同佢相處落，大家都好有共同目標，好實在。加上我份人好不拘小節，唔會太在意瑣碎事，佢都好理解。」
難得遇到一個可以互相包容的伴侶，說實在是可遇不可求，因此張鐸眼見松松的猶豫，不擅辭令的他繼續用行動去感動松松，她憶述老公當初追求的甜蜜舉動：「其實每一樣嘢都好打動我，但最難忘嘅，就係當時喺上海拍戲，當時冬天天氣陰陰濕濕咁，又落緊雨。未埋位嘅時候，佢眼見我同導演對緊劇本，就將身上嘅羽絨披喺我身上，我自己都估唔到，原來佢係一個暖男，因為佢外表好cool，唔出聲以為佢嬲咗成村人咁。」這種反差，完全地攻陷了松松的心，「佢為人好有擔帶，對任何前輩都好好、恭恭敬敬，令我覺得佢有依靠感。」如是者，松松當初對年齡差異的抗拒，隨之消散；亦因張鐸問她一句：「其實沒有甚麼好害怕（相差8年）。」兩人終於走在一起。
松松出生於南方，張鐸就來自北方，彼此最初都有差異，直到現在都鬧出了不少笑話：「有時候傾偈，我唔太明白地道嘅北方話，佢鬧我蠢都會唔知㗎；不過當然，有時我都會講廣東話笑佢，搏佢聽唔明！哈哈！」就算有文化差異，溝通從來都是經營關係的重點。手挽手走到第10年，松松姐姐就講到愛情保鮮的心得：「佢（張鐸）就話喺一個家庭入面，只可以聽一個人講㗎啫，所以佢將所有決定都交畀我，佢話我先係CEO。」未知各位女士會否很羨慕？不過，松松姐姐再補充：「講笑啫，其實我哋好坦白，基本上係冇秘密。如果有問題嘅時候，就會一齊去workout一個solution，會用一個坦白嘅心去商量，究竟係用咩方法。」
其中一個方法，就是解決大部分情侶、夫妻都會面對的問題：吃晚餐，但沒有頭緒。松松與老公商量出打分制度：「如果一個想食韓國菜，一個想食日本菜，佢就會叫我各自評分，10分為標準，韓國菜8分，日本菜5分，好啦咁就食韓國菜。（有冇試過真係揀唔到？）唔會揀唔到嘅，只要你將所有喜愛，憎恨講晒出嚟，一定會做到決定。」記者聽罷，也覺受用。
松松與張鐸走到現在，她都意想不到，所以她非常感激身邊的家人、好友給予的祝福，讓這段婚姻更美滿。而兩人其實喜歡小朋友，也嚮往家庭生活，有想過擁有小朋友嗎？松松說：「佢（張鐸）都好鐘意小朋友，但係因為依家年紀大咗，會好擔心自己會湊唔嚟；又或者驚同小朋友之間會有代溝。」她笑言：「生仔確實要趁早生，所以呢個時候，大家都好好享受生活。」兩人雖然沒有小朋友，但都一致認為無論去到幾歲，都會繼續工作，偶爾去度度假，享受人生。