【金像獎】林子聰谷德昭扮星爺偉仔 鄭中基表演甩轆林敏驄甩鬚
今屆金像獎可謂絕無冷場，除了候選名單個個勢均力敵，賽情緊張，就連頒獎嘉賓都妙語連珠。林敏驄去年同鄭中基拎白只個名搞笑，今年就安排齊齊頒最佳攝影和剪接。至於幕前最配的一對春嬌與志明（楊千嬅、余文樂），在頒最佳女配角前，就數到個個都同余文樂有關係咁。不過全晚玩得最大算係林子聰和谷德昭，講到似層層以為有周星馳同梁朝偉出場咁，原來只係兩位戴個面具即場做視覺效果，實在過份，過份地好笑。
林敏驄抽水宣傳
去年林敏驄同鄭中基，單單搵白只個名都玩足一part，玩到幫人改晒成個家族名單，阿爸係白蘭度、阿媽係白蘭氏、阿叔係白膠漿，反應極好。估不到今年大會特別找回林敏驄搭白只做頒獎嘉賓，一出場林敏驄一反常態，一臉正經講︰「2017係好特別的一年，在那年6月的9號和10號，會有場好精彩的演唱會。」原來係抽水宣傳自己個作品展。林敏驄在頒最佳攝影前，講到自己有持別找最佳攝影杜可風請教︰「我問佢有咩方法可以拍到白只似番個人呢，佢話高炒低炒點拍都係攬炒。」
去到頒剪接，林敏驄又猛數幾位候選最佳男主角的人選，數到白只不禁問句︰「男主角又關最佳剪接咩事呢？」林敏驄︰「唔關事，咪剪走去，唔係請個剪接師返來做咩呀？」笑中有深度。
聲演星爺偉仔
此外，楊千嬅跟余文樂一齊頒最佳女配角前，樂仔講到個個都同自己有關，數到JM（文詠珊）時，余文樂說︰「文詠珊其實是我紅顏知己。」千嬅跟着說︰「我真係聽過喎！」樂仔︰「在《狂獸》（電影）入面，你唔好亂講呀，唔好跣我。」
去到林子聰谷德昭頒最佳視覺效果，兩位講到自己出場只係為介紹兩位隱藏頒獎嘉賓，又話兩位未在電影合作過，同一電影中出現的就只有谷德昭執導的《玻璃樽》，話說這套由梁朝偉做配角的電影，有星爺客串一幕，隱藏嘉賓呼之欲出，結果原來係惡搞一場，兩位即時戴上綠幕面具，然後來個臨場視覺特技扮星爺偉仔。隨後兩位在頒發最佳音響效果，又借星爺同偉仔把聲過橋，自己就夾口型扮靚聲。雖然被騙了，但好好笑。
除了事先安排嘅笑料，金像獎當晚都有唔少蝦碌場面，好似鄭中基開場的表演，扮《花樣年華》偉仔梳頭一段時，本身chok到飛起要穿背心，不過太用力，把肩位的魔術貼扯開咗，搞到甩衫咁。接住扮Mark哥在花盆中抽出大炮，豈料「大炮」太流，一拉起紙筒頓時散開，嚇到基仔個心都離一離，好在他見慣大場面，一連執生都冇難度。另外疑幻似真嘅笑位仲有曾志偉與施南生等人頒發「最佳電影」時，志偉在台上坐到瞓着咗，不過到底係真瞓假瞓就冇人知。