下流上車族｜江美儀睇好林敏驄攞視帝：佢同曾志偉咁好朋友
撰文：吳子生
出版：更新：
江美儀（美儀姐)今日（31/10）現身葵涌進行廣告拍攝。談到她有份演出的無綫劇集《下流上車族》收視高企廣受好評，美儀姐直言喜出望外：「其實我哋係冇諗過會咁入屋，始終我哋唔係啲咩大片，諗住大片先會有人去關注。起初都只係諗呢套劇得20點左右，始終呢個時勢有人睇已經好好，點知出到嚟又會咁高收視喎，原來林敏聰咁入屋喎，大家都知佢個樣癲唔癲、蠢唔蠢咁，點知後尾佢入屋，真係估唔到反應咁好，嚟近十集先係戲肉。」
林敏聰被譽為劇中靈魂人物，有望爭視帝。美儀姐表示：「講真佢唔視帝都係最受歡迎啦，因為佢同曾志偉咁好朋友，使橫手嘅嘢你哋明㗎啦，而且佢同啲話到事嘅人關係咁好，哈哈！咁呢樣嘢都係講笑。其實我哋從客觀咁去睇，佢真係做得好好，因為好多人都冇見過佢咁正經，而且啲人見到佢喊就覺得佢好神級，我係覺得好唔公平，因為我都有喊，但唔見有人讚我，哈哈！」