下流上車族｜羅毓儀男友被指似林敏驄：我覺得佢好靚仔又有才華

無綫55周年台慶劇《下流上車族》舉行宣傳活動，劇中多位主要演員均希出席，包括飾演林敏驄女兒的郭柏妍以及羅毓儀。

她們的角色都很慳儉，問到現實生活中可會也是慳妹一名？郭柏妍說：「我都鍾意搭公共交通工具，有時搭地鐵仲快過搭的士。(有無試過一個飯盒分兩餐食？)咁又無，不過我唔鍾意浪費，喺唔浪費嘅角度，我會打包啲食唔晒嘅嘢食，好似去飲一圍圍嗰啲食剩咗，我都會打包走，只要係乾淨衛生就無問題。」

而羅毓儀就指自己如果忙住開工無時間使錢時就會好慳，因為根本無時間可以花錢，錢都是用在搭的士之上，食飯則是在公司canteen食。但當不用開工時她使會很大使：「一唔使返工就會好想買嘢，我諗我會變成月光族。」

她透露曾經有段時間幾慳，會將着過的衫保存得好好，着完又着。提到她男友被指外貌似林敏驄，問到她揀男友是否不睇樣？她即笑言：「嘩，咩意思先？我爹地（林敏驄）又靚仔又有內涵又有才華。我覺得一個人嘅外表內涵都好重要，外在內在都睇，我覺得我男朋友好靚仔又有才華㗎。」