謝霆鋒又再chok出天際 衣架晾意粉夠創意 計時斬大蔥快到數唔到
謝霆鋒近日在飲食界聲名大噪，因為他的廚藝技驚四座：揈蕉、拍匙點綴食物法，還有最新向廚神Gordon Ramsay致敬的磨刀秘技，讓觀眾眼界大開，還有昨天的衣架晾意粉，就快要向他拜師。不過，霆鋒大概心想：千祈唔好俾佢停！剛剛他再有新搞作！他在新片中示範摩打手切蔥，仲叫人切勿隨便摹倣，齋切蔥？唔符合霆鋒性格，所以他叫友人數他在15秒之內切大蔥切了多少下。他一手起，真的快到數唔到。不過，這並不是重點，重點是霆鋒chok切大蔥有幾型。網民見到都目定口呆，留言話：「唔知點講！」可想而知，霆鋒刀功有幾勁啦！
霆鋒的廚藝總是讓人出奇不意，除了快刀斬大蔥，他昨晚在Facebook有創新發表，就是用衣架晾意粉。霆鋒近年醉心廚藝，並不是單純煮完就算，在食材上都要親力親為。他今次煮意粉，就必然要還原基本步，親自用麵粉做意粉，一手一腳切意粉，最後就做大家眼見的步驟：晾意粉，然後再上載最新烹調的菜式，海膽creamy扁意粉。之但係，特意用幾個衣架掛意粉，會唔會chok得濟？有網民見到除了讚霆鋒有創意之餘，都有人忍不住留言：「廚房咁大，真係冇其他工具？要用衣架掛意粉係咪標奇立異呢？」
《香港01》就霆鋒獨門的衣架風乾意粉法，詢問過前米芝蓮餐廳大廚、現自立門戶開西餐廳的羅駿熙（Jack），他早前才由意大利回港，熟悉當地菜式。問到霆鋒用衣架晾意粉的做法是否可行時，阿Jack笑言：「佢本身都chok開。」後來續道：「其實他整完即煮的話，可以不用風乾，直接落鑊煮就得；不過就儲存層面來講，風乾是會keep得好啲。」
講到製作麵條，阿Jack煮開意大利菜，表示意粉都會有風乾過程。如果追求正宗做法的話，風乾意粉的工具都會比較講究：「風乾係會好一點，至少意粉難點黏在一起。工具上，其實用木具會好些，或者不鏽鋼都可以，這樣就可以保持意粉的質感同味道。（那麼霆鋒用衣架又work唔work？）衣架就有層膠包住，意粉本身又好少找膠質的東西去晾，最好就唔好啦。」
其後翻看其他大廚，當然就必然是霆鋒偶像Gordon Ramsay，他準備製作意粉時，基本要有的工具都齊全，去到晾意粉環節，他就把切割好的意粉掛在不鏽鋼架上，有晒功架。另一方面，其實如果沒有木具、鐵架，都有廚師切完意粉之後，將之平放在乾布，再滲上麵粉以保持乾爽，然後再風乾。所以話，霆鋒今次用衣架掛意粉，真係創意100分。