愛回家｜「細龍太」陳思圻爆被前輩粗口鬧　蘇韻姿：人係會有情緒

在無綫處境喜劇《愛．回家之開心速遞》中飾演「細龍太」的陳思圻（Vicky，前名陳偉琪），日前在一個網上節目中大爆當年在拍攝《愛．回家》時，被兩大前輩及導演當眾羞辱，用粗口喪鬧她不懂演戲，令其感到委屈又難過。

今日（10/9），有份在《愛．回家》演出的蘇韻姿現身灣仔會展時裝騷時，就上述事件表示：「其實我就唔係好清楚呢件事。因為我同佢真係唔係好多同場嘅場口嘅，而我主要嘅戲份都係拍熊家同補習社嗰邊多，而我喺劇組都6年時間，我諗同佢同場唔多過3至4次。（有時對手及導演會唔會語氣重咗？）咁我又覺得每一個人都係人，人係會有情緒。無論導演、服裝、化妝及自己，間唔時自己心情差咗，可能講咗一啲唔好嘅語氣說話我都會嘅，所以我就覺得冇完美嘅。（有冇見過導演鬧過其他演員？）睇戲都會見到嘅，但其實我哋公司大家合作拍戲成個氛圍都係好開心，大家合力完成一場戲，係用咗好多心血先會完成。」