【我瞞結婚了】洪永城忽然被激讚似BIGBANG勝利：咁榮幸呀！

洪永城及黃翠如繼《愛我請留言》後又再合作拍攝《我瞞結婚了》，劇集終於在昨晚首播，睇嚟網友對於劇情已經不再重視，話題反而去返洪永城及黃翠如這一對曾經引起熱話的「熒幕情侶」。過往曾一度被網友攻擊的洪永城，劇集一出就被網友大讚「靚仔」、「洪仔有吸引力啲」，「好似BIGBANG的勝利」。正所謂「各花入各眼」，每個人對靚的定義都不同，但最好笑的是黃翠如的「真．男友」蕭正楠都慘被拖落水，二人的外形被網友瘋狂討論。

洪永城接受《香港01》電話訪問時，對於被網友激讚，他說：「好多謝他們的讚賞。（有人覺得你似BIGBANG的勝利。)咁榮幸！之前都無人咁講過，其實我可塑性好高，有些人話我似日本人或者韓國人。」至於有人將他同翠如的男友蕭正楠比較，Tony都好謙虛說對方好過自己，「他一定好過我啦，他唱歌又得，其實今次我同翠如再拍劇已經好有默契，都無額外做啲咩嘢，希望觀眾都有同感。」另外，提到最多人講一定是希望洪永城同翠如再合作拍旅遊節目，Tony都話現在想重看回過往他們合作的旅遊節目，其後當問到如果之後再同翠如合作會不會避忌？他說：「一定不會啦，如果網友鍾意，我地都好樂意迎合大家！」