與舊愛鄧麗欣同台　小方：追佢？隨緣喇

方力申(小方)和鄧麗欣(Stephy)兩個又同場，今日兩個加埋任賢齊一起出席第五屆揹水一戰比賽，體驗山區農民每日揹水的生活，為慈善盡一番力。兩個同場少不免會引起話題，初時兩個都尷尷尬尬，看得出是有點避忌，亦沒有應記者要求一起合照。到大會叫他們上台，當小方把咪遞給Stephy時才有第一個接觸。雖然在同一個台上，不過這對舊情人基本上全情零交流，只有在大合照時因為小方要搭著該活動的會長身上，而剛好手又搭在Stephy的手上，先至有丁點兒的接觸。

小方接受傳媒訪問時，問題都主要集中在他和Stephy身上，有記者指出小方今次比賽要力追早他15分鐘出發的Stephy，小方就醒目地識穿記者已多次提到個「追」字，不過他答覆追15分鐘這麼難，要隨緣，難道當中另有玄機？又說自己跟Stephy都好真實，不會做戲，所以面對鏡頭交流又不是，不交流更不是，都有點兒尷尬。

對於大合照時被指與Stephy的手搭在一起，小方說並不知道，更指Stephy無鬆開他的手是有禮貌，亦指自己沒有感覺，要睇慢鏡重溫一下。其實不經不覺，這對舊情人已經分手了一年，小方直認時間過得很快，有粉絲在網上分享他們的舊post，令他覺得粉絲們都很長情。被問到自己是否長情，他就說：「唔講咁多啦，冇力跑呀。感唔感觸？點都有少少感觸，本來都無乜心酸，俾你愈講愈有，唔好再講。有句說話，人好多時只係懷念回憶，多過懷念人或者件事。人會move on，但回憶喺腦海會愈嚟愈淡，但係始終都會記得。冇得留住一個人，無論愛人定親人都好。」看來小方真的好感觸。

到最後小方也有提到工作方面，指與公司約滿兩個月，暫時未有新去向，更強調Paco（黃柏高）關係很好，對方是睇住自己大的一個人，也有給他空間作不同發展，但自己就不急於找合作夥伴。被問到會否跟Stephy合作開公司，小方說：「唔會啦，以前都講過我哋工作上都係佢有佢做，我有我做，冇理由依家合作開公司架嘛。」