大隻溫家偉爆肌威到新加坡 衝出香港做主角：真係好想拍多啲劇！
撰文：林通賢
出版：更新：
在無綫當藝員，除了要識做戲，亦要識等，等公司睇起，等監製給機會，有人選擇乾等，不過香港先生出身的30歲大隻仔溫家偉（Alan）就選擇主動出擊，在無綫發展平穩的他，讓人最有印象是主持《搵食飯團》，及在劇集《鬼同你OT》飾演「高矮肥」之一。而新加坡方面就相當欣賞Alan，早前出6位數字酬勞包埋機票住宿，請他拍校園劇《Faculty》，劇中當第二男主角。他接受《香港01》訪問時說：「我去新加坡拍了4個月，劇中我做一個富家子，做奸㗎，又殺人又強姦，同我在TVB做的角色很不同，好有挑戰性。」
大隻仔在劇中全英語對白，更為了這個劇加操兩個月，甩掉15磅肥膏，他說：「我是肥底，所以要跑好多，我一瞓醒就出去跑大約30至50分鐘，戒口就一定啦，跑完返嚟隊12隻蛋白，菜呀、下午食果仁啦，乳酪，雞胸肉，每日都要食8餐，每兩個鐘頭左右就要食嘢，同埋最緊要係夜晚八點後不進食。」
大隻仔希望可以打開新加坡市場，因為他好想拍劇，他說：「其實去邊到都要等，我喺TVB已7年左右，我拍劇就好少，可能我中文唔好啦，綜藝節目我就好多，我好多謝佢哋㗎，但我真係好想拍多啲劇，咁咪自己喺到等下先，所以出面有機會都好開心。冇TVB都冇人識大隻仔啦，所以我喺TVB都唔會灰，如果之前無拍《鬼同你OT》、《衝綫》，有返啲演戲經驗，今次新加坡呢個機會，亦未必做得好，所以都多謝TVB，我亦會繼續勤力。」態度正確呀！