顏穎思淡出演藝界後變女強人　小紅書介紹珠寶獲網民激讚仲咁靚

陳冠希前度之一嘅顏穎思（Rachel Ngan），自從退出演藝界之後，於2014年與教友Matthew Chung結婚，並自後誕下三子。近年佢投身珠寶界，並成為高級珠寶品牌香港區負責人而再次現身幕前，近日更進駐小紅書，顏穎思於影片中以流利普通話同大家打招呼，並表示之後會介紹不同嘅珠寶，希望大家睇完靚嘢之後心情會更好。

雖然退居幕後多年，但39歲嘅Rachel仲保護得十分好，唔少內地網民對佢都依然十分有印象，甚至講得出當年佢參與過嘅電影作品，令顏穎思十分意外：「以為已經沒人記得，很開心能在這跟你聯繫。」顏穎思退出娛樂圈後，曾修讀法律課程，但因為姐姐關係，開始接觸瑞士日內瓦高級珠寶品牌Boghossian，至去年成為品牌香港區負責人。