陳詠燊爆最憎某香港導演　拍笑片扮熱血：有冇偽善到咁呀！

導演陳詠燊同演員陳湛文近日為網上平台盒子BOX channel節目《月傾會》做嘉賓，林柏希與他們大玩真心話遊戲，如果避開不答問題就要接受懲罰食大蒜和指天椒。

林柏希問導演陳詠燊，合作過嘅藝人之中，邊個最好？邊個最難頂？合作最愉快，導演秒答：「子華，一來我係好愛佢啦，佢係我偶像；第二係成個合作過程個默契，好到我前所未有咁好呀！」而最難頂的藝人，陳詠燊就選擇不作答，說：「唔開名啦，編劇年代，我嗰陣時拍好多愛情喜劇，好多係年輕偶像，其中有一個，同佢傾戲嘅時候掛住玩啦，拍完又喺度扮晒嘢，其實喺嗰班好紅嘅年輕偶像嚟講，佢係最唔紅嗰個！男星嚟，佢而家偶爾會有一啲新聞㗎，但係都唔會點樣出現㗎喇！」

之後陳詠燊亦被陳湛文問：「邊個導演你覺得係低檔次到，你一定唔可以效法嘅？」陳詠燊就回答：「我食啦，講咩都得罪人！」之後也不開名地透露，說：「我好憎啲戲偽善！嗰條片係一條噱頭片，本土笑片、噱頭戲，總之成班後生仔唔知做啲乜，跟住佢最尾夾硬兜嗰種咩熱血呀，同某一個歷史年代嘅一啲Hero溝埋一齊。我就覺得，你有冇偽善到咁呀！」