新冠肺炎︱TVB擬推「閉環式」工作空間　馬國明：未必啱我哋劇組

本港第五波疫情嚴峻，確診數字高企，早前更傳出疑禁足全民檢測，令市面出現搶購潮。馬國明接受《香港01》訪問時表示保持平常心，以及盡量減少外出：「唔係好擔心，一直有做檢測，暫時好彩仲未有事。自己盡量小心啲，減少咗好多出街。」

市面早前出現搶購潮，馬明指自己未有搶購物資，平日去開的超級市場亦貨源充足：「聽新聞話廿幾號先全民檢測，仲有十幾日，都唔使咁早去搶物資，冇特登去搶物資，每次去超級市場都會買多少少，唔使咁頻出去買嘢。我去嗰間冇貨架清空晒咁誇張，係有啲嘢賣晒，但仲有好多都有貨。」

受疫情影響，TVB所有劇組暫時停工，馬明表示工作上一定會有影響：「套劇停咗，等公司安排，延期一定有，不過平常心。希望疫情快啲過可以開拍返，套劇唔係拍淨好多，希望可以盡快開返工拍埋佢。多啲留喺屋企，會做下運動、睇戲，疫情快啲過就可以過返正常生活，好想快啲踢返波。」今日（11日），有傳TVB將推出「閉環式」工作空間，馬明指一切等公司安排：「套劇唔係淨返好多廠景，呢個政策未必啱我哋劇組，淨返大部分都係外景。可能第二啲劇啱啲，我哋套劇就未必好幫到手，不過都係等公司安排。」

點撃睇更多馬明、靚湯照片：