TVB下星期全面閉環　人事部買緊過百睡袋

第五波疫情持續，唔少藝人先後確診，無綫有見及此，將大部分劇組停工時間延長至3月20日。由於拍畢劇集存貨實不多，加上有傳停工有如日燒200萬，今日有報導指無綫將推行「閉環式」工作空間：參加同事通過檢測後，全天候留宿電視城內，為期約3星期。

無綫電視企業傳訊部總監黃德慧接受《香港01》查詢時，承認下星期將實施計劃。「我哋統計過廣播、製作、拍攝、文職約有一百人可以參加呢個計劃，首批會係《東張西望》、同《愛•回家》嘅同事，不過有家室嘅同事我哋會勸阻對方參與。」電視城雖然係一個「城」，有便利店、銀行、餐廳、休息室等，但「封城」意即藝人及工作人員有入無出三星期，問到可有足夠物資及休息地方提供，黃德慧表示：「除休息室同寫字樓之外，走廊都可以瞓，如果同事想瞓旅遊巴，我哋都可以租，人事部而家已經買緊被同睡袋。」

黃德慧表示同事對參與計劃都十分踴躍，而身為總經理嘅曾志偉亦係其中一員：「曾生一定會參加，佢已經諗緊提供咩菜式比同事：至於主席許濤，佢都好想參與，但人不在香港。」對於會否參加封「城」計劃 ，《香港01》曾向《愛•回家》嘅主角之一劉丹查詢，但暫時未有回覆。