【親親我好媽】何廣沛都有MK時 金毛扮反叛：外形搭夠就有個勢
TVB劇《親親我好媽》自播出以來反應不俗，除了題材大講怪獸家長夠晒貼地，正中不少父母內心深處外；另一女新星江嘉敏以校服Look粉墨登場，讓觀眾覺得她又pure又true，使她人氣急升。不過除了這兩大看點，同劇還有個何廣沛，雖然近期「老是常出現」，但他既然被網民譽為2017年上位男藝人，有一副小生相，就一定不能夠忽略啦，係咪先？不過何廣沛對於自己外形，他以「醜小鴨」來形容，他可塑性高的事實，一切由他18歲後除下厚重眼鏡開始。
話說何廣沛接受《香港01》訪問之前，正是他為接拍新劇《天命》剃頭的前一天，談起髮型問題時，他除了不捨一把秀髮，還提起18歲時曾留過「MK頭」，睇一睇相！嘩！係傳說中嘅「飛輪海頭」呀！驟眼一望，長髮的何廣沛，與日本男星小池徹平有幾分相似。好多人都會對過去感到不堪回首，認為那都是黑歷史，但何廣沛就話：「唔係喎，我仲好鍾意呢幾個髮型好型喎！同埋我唔覺得係MK，不過其他人實會咁覺得。」
望住呢幾張相，何廣沛話：「個陣時好Hit F4、飛輪海頭㗎嘛，成頭金色咁。諗起以前我gel頭好叻㗎，但而家就唔識gel，以前起碼都要用一個鐘頭gel個頭，仲要逐條逐條gel㗎！我諗而家好難再有咁長頭髮啦，嗰時啲頭髮長到人哋搭我膊頭都會扯住。」何廣沛笑言如果下一套劇可以做返MK仔，應該都會好開心，所有回憶都返晒嚟。
眼見何廣沛18歲就一副明星臉，相信他年輕時一定勁受歡迎，誰知他連聲否認：「唔係㗎，我以前溝唔到女㗎！同學都唔會談論，嗰時又帶眼鏡，又唔知自己除咗眼鏡會靚仔咗。」直至何廣沛除下眼鏡的一刻，讓身邊朋友眼前一亮，陸陸續續地被人封為萬人迷，所以何廣沛形容自己以前是「醜小鴨」，若不是他意外一脫，大家可能會錯過呢位靚仔。
講起以前的校園生活，對比他在《親親我好媽》飾演的反叛文亮熙，當然差好遠啦，但他笑言以前班上同學都會不自覺地怕了他：「我生得高啦，咁啱有10個男仔差唔多高度嘅行埋一齊，有外形搭夠就會有個勢喺度，啲人望到就會驚，但其實咩都冇做到，得個殼咋！」講起在學校做過什麼壞事，何廣沛就話：「掟粉筆就唔講啦，試過夜麻麻偷走出去，第二朝返學就瞓覺囉。不過我係老師心目中都唔係曳，因為我個樣望落唔算曳，而且我識攻下心計啦，會做Miss得力助手，所以有咩事都會豁免我。」曾被Miss形容「練精學懶」的何廣沛直言學生時期唔讀書：「講真！我而家讀書仲多過以前！因為要睇劇本！」
由校園生活到現時演員生涯，何廣沛頗有人緣，被大多網民睇好，認為「2017年上位男藝人」非他莫屬，又封為TVB小鮮肉，評價大致理想。他說：「我有留意相關嘅言論，都開心嘅！始終都有人留意，但最緊要Keep住有嘢做，唔係講完就算啦，始終呢一行可能轉個頭就冇嘢做，都會擔心嘅。」所以何廣沛唔介意自己不停出現在電視上，盡量洗觀眾腦咁話！