肥姐沈殿霞逝世14周年　鄭欣宜曬舊照爆秘密：佢真係會兜巴星我

有「開心果」之稱沈殿霞（肥姐）逝世14年的忌日，愛女鄭欣宜在社交網上載小時候跟亡母的合照，更激罕以中文寫下感受，更揭開肥姐嚴母的一面：「當我嘈喧巴閉、跑來跑去、坐唔定嘅時候佢只會大聲喝我一聲『鄭欣宜』再加多一個嚴厲眼神我就會靜止下來（其實通常唔使講任何野，掘我一眼就夠）。但當我最跩最跩例如蝦婆婆或者突然變Moody黑起塊面冇禮貌唔睬人或者講大話時⋯⋯佢真係會兜巴星我。然後佢就會叫我跪喺地下掹住耳仔。最搞笑係，俾佢打完，我梗係會喊啦～佢就會叫我『唔準喊！』。」

雖然肥姐會罰她，但適當時又會呵返欣宜：「當我開始感到內疚時真係諗得通了，佢一定會叫我『過嚟，錫返』，然後我就會好似隻小胖羊走到佢身邊，貼住佢。佢就會攬住我，好聲好氣同我解釋我錯喺邊度。佢會同我解釋⋯⋯其實打我佢仲痛過我。今年35歲了。佢都走咗14年了。人越大越珍惜佢那種不離不棄。無論我有多壞，無論我令佢多失望，到最終佢都會叫我『過嚟』然後錫返我。」除了媽媽以外，欣宜亦希望能夠找到在任何情況的最終都會叫她「過嚟，錫返」的人，希望她早日如願。