鐵拳英雄｜吳家樂爆肌鋼鐵身型獲監製激讚　地獄式訓練付出驚人

無綫劇集《鐵拳英雄》已進入結局周，在日前播出的第26集中Final Boss吳家樂終於現出真面目，與劇中女主角姚子羚展出了一場黑夜滅口大追殺的戲，姚子羚拆穿了他一直以來的陰謀，兩人大打出手，緊張刺激。而該場戲最搶鏡的，可算是家樂扯爛衫展露出超完美的鋼條型爆肌身材，極之吸睛。

本月底便踏入50歲的家樂為這套劇真的付出了很多努力，就連該劇的監製文偉鴻亦特別於FB出Post表揚他的付出，表示：「為了達到路向東廢了武功的謊言設定，我要求家樂要保持瘦削外型，但又要有一身橫鍊肌肉，鋼鐵身型！地獄式訓練非常認真！好意志！好成績！好演員！👍🏻👍🏻👍🏻 @ngkalokcarlo」據悉，家樂為了在2019年拍攝該劇，他於2018年已開始加強修身鍛練，甚至在新疆拍攝 《包青天再起風雲》也跑步加操，認真又專業。

家樂接受《香港01》電話訪問時表示：「見到監製出post好感動，佢要求好高，而佢寫嘅嗰番說話正正就係佢同我傾偈講我個角色時所講嘅，我明佢要啲咩。其實唔止我一個，好多演員都好努力裝備自己，呢個劇入面個個都操得好fit，作為一個演員接到演出機會就應該全力去做好去。幕後團隊都好努力，係佢哋營造到我好犀利咁樣，打造我嘅造型又要兼顧個神秘感，最後認為蒙面係最瀟灑。」談到拍打戲時很辛苦，家樂說：「做咩都辛苦，拍打戲總會受傷，好正常。監製要求我哋盡量真身上陣，為咗出嚟嘅效果都要硬食，但係作為專業演員就要咁樣。我之前拍《城寨英雄》有6套衫打爛咗5套。」

至於怎樣地獄式訓練，他說：「我本身好鍾意做運動，最鍾意跑步，因為最方便，同埋都成日去踢波，平時都有操開，收到劇本之後就加強鍛練，不斷去操，要瘦要夠乾身。其實個個都無啖好食，控制飲食係必然，我哋個個都自己帶飯，食啲嘢無味，大家都好努力為角色設定去做好自己。我喺拍之前2星期有加操，拍之前2、3日唔飲得水嚟修乾個身。可惜拍嗰場戲時落雨，結果要擇日重賽，一個月後補拍，又要keep多一個月。拍完嗰晚係通宵，我同Grace (王君馨) 即刻去咗去食車仔麵，我仲飲汽水，Grace問我會唔會keep，我話唔會。真係操到有少少抑鬱，個人唔開心，我本身好為食，鍾意食雪糕、叉燒，為咗個角色全部唔食得。我同伍允龍成日望下部零食機當食咗。不過我覺得最辛苦係要隱藏個角色。」

家樂於1995年曾與古天樂、劉愷威、古巨基以及何遠恆組成「新五虎」，備受力捧。雖然他多年來並非擔演一線主角的角色，但他演每個角色都有用心去演，所以入行多年劇集長拍長有，工作機會不斷。私底下的他亦擁有幸福美滿的家庭，他於2006年3月迎娶拍拖1年多的其士集團太子女周蕙蕙，外界更稱他為「50億駙馬爺」。到07年兩人的大女出世，08年孖仔出世，家樂為了照顧三個仔女，曾有一段時間暫停拍劇，專心做湊仔公，待仔女稍為長大之後才再投入拍劇。

點擊睇家樂的完美爆肌身型：