【有樓萬事足】極慳男其實係人生勝利組 有樓有老婆有生意
《有樓萬事足》今晚播出第二集，當中會有早前跟大家提到的「極慳男」岑先生。他過往為買樓，曾每日只限自己用50蚊，又只用2G手機，更甚少出席朋友聚會，為了100％儲到錢，連拖都唔想拍。岑先生的案例一出街，不少網民就疑惑，要有幾辛苦才能慳到咁盡？又問到：「如果為咗層樓慳到咁，人生仲有咩意義？」。同時對他用2G手機感到有趣：「估唔到依家仲有人用Nokia 7100。」對他都非常佩服。另外，有樂觀的網民就替「極慳男」講說話，表示：「有樓自然有女埋身」，又未至於什麼都沒有。
《香港01》就此致電過現為食物批發商老闆的岑先生，他就澄清現時並非單身，已經結婚7年，更有仔女，過往8年並不是0拍拖0社交，不過就強調拜金女絕對埋唔到身：「其實TVB喺訪問入面冇問過我嘅感情狀況，著重我儲錢的過程。儲錢的初期我的確會比較抗拒拍拖，所以我都避免有呢件事發生。直到儲錢嘅中途就遇到另一半，大家價值觀都相近，都知道目標係想有個安穩嘅地方，一齊去努力，諗法唔一致嘅都唔會有發展可能。」岑先生就算不用拍拖的時候，他亦自豪不是低頭族，出外多做義工等活動，反而多咗朋友，並不是大家所想，人生只得一層樓。
那麼，一日只用50蚊，又點樣拍拖呢？岑先生說：「其實一般情人節等日子，我都不會送花。食飯大多數都去彼此的家解決，順便可以見見家長。日常生活又不會特意去行街Shopping，選擇去散步，行行海灘。如果送禮物，我都會自製心意卡，親自剪貼突顯心思。」他也承認自己在異性眼中不太會用錢買浪漫，而且要另一半一直陪自己慳也不太好，「其實到儲錢尾聲的時候都開始冇刻意慳到咁盡啦，都會同佢出去食下飯，氹下佢開心，所以大家都係會有共識。」
另一方面，大家都好奇，真係仲用緊2G手機？岑先生就承認：「係呀，我仲用緊㗎！不過因為工作關係，我都有用3G手機，係公司眼見我仲用2G手機咁唔方便，所以出咗部S4畀我，我自己都冇特別去追求科技嘅嘢。」而他不曾脫節，皆因他都有用Facebook，「只不過我用Laptop上。」謎底終於解開了。