劉丹變御用喪妻男 網友強烈要求無綫還丹爺一個「老婆」
撰文：溫菁莉
出版：更新：
相信過往有不少電視迷每晚8點都會捕實電視機睇《愛．回家》，因為劇情夠貼地夠共鳴，更帶挈劇中一眾飾演「馬家」上下嘅演員「入屋」。而昨晚終於播出系列嘅第四輯《愛．回家之開心速遞》，雖然與「馬家」無關，但今次劇中依舊仲有劉丹（丹爺）嘅存在。
昨日播出街的第一集就講丹爺飾演嘅熊樹根獨自湊大三個女兒，話咁快就有眼利嘅網友即刻係討論區出post，希望TVB之後可以安排返一個「老婆」俾丹爺。點解咁講？睇返丹爺這幾年參演的劇集，大部份的角色都是喪妻，包括《天與地》飾演的江兆泉、《愛．回家》第一輯飾演的馬虎、《律政強人》飾演的卓繼堯，3部劇集無獨有偶一係無老婆一係就老婆去世。最好笑莫過於係網友推薦新抱楊冪飾演丹爺老婆，但深信丹爺應該接受唔到囉！
而網友都建議TVB在之後的劇集可以配年輕女演員俾丹爺，覺得咁會突破。其實TVB一早就已經安排係即將播出嘅劇集《不懂撒嬌的女人》裏，丹爺同于淼有感情戲。于淼今年26歲，而丹爺就72歲，二人相差足足46歲，可以話係「爺孫戀」，雖然年齡不是問題，但相信到時劇集出街又必成為熱話。