【有樓萬事足．有片】張繼聰謝安琪住過大埔村屋：不應同物質掛勾

最近TVB新節目《有樓萬事足》中，22歲參加者Seasun一句「有樓有高潮」、「冇樓唔好白撞」、「有樓等於有安全感」等語出驚人的金句，掀起全城觀眾瘋狂討論。今日《香港01》就搵來一眾藝員，睇下他們有何看法。

張繼聰

張繼聰認為愛情絕對唔可以同物質掛鉤，提到當年由700呎村屋搬到現時4000呎豪宅，過程有無辛酸史？阿聰笑言如果要講，要講幾日。他指如果快樂要同屋企有幾大及月入多少做比較，世界唔會咁精彩，幸福係在乎睇下你點去睇呢個世界。

麥明詩

麥明詩就話自己屋企無2000呎，但就好有安全感。咁另一半係咪有樓先有安全感？佢認為若果兩個人嘅人工可以足夠供樓就已經有安全感。麥明詩直言另一半有無樓絕對唔係交往嘅首要條件，「最重要梗係要專一，因為你有層樓但個人走咗去，都無意思。但有屋企對傳統中國社會來說非常重要，而我都好佩服父母好辛苦咁供一層樓返嚟，佢哋咁辛苦絕對唔會幫到我供第二層，所以都係靠自己努力工作啦。」

李佳芯

對於「有樓有高潮」，Ali就話好容易，「如果自己努力工作搵錢買樓，好容易自己滿足到自己呢個高潮。」她笑言唔需要另一半有樓有錢，「我只係需要愛就夠了，最重要有愛心，啲愛對我係佔大部分，咁就夠㗎啦。」

陳嘉寶

Anjaylia認為每個人對於安全感定義都不同，笑言自己嘅安全感係由細到大攬住瞓嘅公仔，「樓嘅嘢我一向都無，唔可以話我20幾年無安全感㗎嘛。」咁對於另一半係咪有樓先嫁得過？Anjaylia表示最重要是雙方有共同價值觀，買樓嚟講都係覺得自己儲錢買最好。