【有樓萬事足】音響公司CEO求包養？ 28歲阿龍：講男女平等
TVB實況節目《有樓萬事足》未出街，就已經有話題。愛樓港女Seasun講金句仲多過劇集，例如「有樓有高潮」、「間屋至少要有二千呎」，還有「冇樓就唔好白撞」。這些說話讓網民側目，紛紛鬧她究竟憑什麼，其價值觀已經扭曲到，愛情建基於物質上。直到後來，Seasun就被起底曾經住過富豪趙世曾的趙苑，即刻明白她點解會話二千呎是基本。而節目裡，亦有安排男士反撃港女Seasun的「獨特見解」，直頭就是男女之間的大對決。
第一集就有28歲的阿龍，他就極不同意Seasun有如此扭曲的價值觀，希望可以代表普遍男士講出心聲。眼見Seasun覺得自己有樣有身材，要求有樓有真愛，但似乎覺得這是必然，又沒有半點付出。阿龍遂講出「求包養論」反撃Seasun，認為這不是「老奉」：「女人而家成日都講求包養，而家呢個社會講求男女平等，既然係咁男士都可以求包養啦。而且女人嘅青春都有時間性，到咗50歲就會巢皮，反而男人就可以keep得耐啲，用落男人身上都仲可以保值啲，邊有得要求人哋有層咁唔要面。」阿龍如此說，唔怕會被一班港女圍剿？他就解釋這番說話的用意：「其實我都係想講，愛情呢樣嘢唔係老奉，兩方都要有付出。與其去proud of自己有樣有身材，其實內涵仲重要啦。」
講到男人都可以「求包養」，阿龍就覺得女士對「男女平等」有種錯誤見解：「話係平等，但其實係想人優待，尤其是蝕底就話追求平等。（男人都可以求包養就會畀人話食軟飯喎）如果講得男女平等，呢啲說法就唔應該存在。」不過，阿龍就講真話：「如果真係有人送層樓畀我，我係唔會接受嘅，我會想一齊住，同埋日常生活上我都有能力自己搞掂。」阿龍對於另一個「有樓求真愛」女Inky表示欣賞，因為她不計較物質。
另一邊廂，阿龍對事不對人，縱然他不同意Seasun的價值觀，但對於Seasun的夢想是住2000呎大屋表示尊重，「做唔做到係另一回事，但起碼佢夠膽講自己夢想，就好似其他人話想做太空人一樣，未必做到但講到我覺得可以接受。」阿龍更話他有些女性朋友跟男友聲稱不在乎物質，但面對朋友就講真話，話自己恨有樓，咁先最唔要得：「我聽到會鬧佢哋。」
28歲的阿龍現時為音響公司CEO，講到開公司的經過，他指曾打工3年，工作都與音響有關，期間就把剩低的錢用作投資，與此同時開始買入器材；開公司後，阿龍都有向銀行借錢，慢慢就把錢賺回來，現時生意都不俗。問到他的置業理念，他都講出自己夢想：「我都想住複式嘅，目前就未做到，但都係我第一個夢想嚟嘅。」至於買樓，阿龍就覺得其實租樓都唔錯，似乎唔多想買樓，其實阿龍又年輕，自己又有一門生意，未知女士們又會否視他為筍盤？