【有片慎入】暗黑廚師腳踩鳳爪片流出 鼎爺：我都係用水沖下
撰文：郭敏玲
出版：更新：
有句說話：「出得去食嘢，就唔好理啲嘢食點整。」因為有時候總會流傳幾個飲食界處理食物的暗黑方法，真係唔知好過知。近日網上就有流傳一條片，片段大約二十秒左右，就是酒樓廚師穿上水鞋，面前有一大盤醃鳳爪，然後廚師上前直接用腳踩鳳爪，左踏踏又右踩踩，過程更有幾隻鳳爪跌落地。睇完條片，都唔太清楚廚師動機是什麼，為了令鳳爪更入味？其實可以用手嘅。有傳聞食物跌落地下3秒之內拾起，食落肚會冇事，不過睇條片，鳳爪直接觸碰地面都不止3秒，食客見到一定會打冷震。
記者就此事就打電話問過煮嘢食出名勁的李家鼎點睇，鼎爺就話雖然家父曾開過大酒樓，不過他未試過在酒樓工作，對這種處理手法就不作評論。咁鼎爺煮食經驗豐富，又會點樣處理鳳爪呢？他說：「咪就係搵水沖一沖囉，要去骨嘅話，就喺掌心用刀界一界，再用指甲尖整佢出嚟囉，就係咁簡單，我煮咩鵝掌乜掌都係咁整。」相信正常都係會用一雙潔淨雙手去處理鳳爪，要醃嘅話，用手仲方便喇。
據知片段拍攝的地點，是位於旺角一酒樓。不過此酒樓經已結業，相信此片段應是舊料一則，不過大家睇完片，出去飲茶又會唔會避免食鳳爪呢？