網傳港台有禁播歌手名單　DJ鄭子誠：港台俾我好大自由度

港台DJ音樂情人鄭子誠今日（28/1）現身電視城出席新劇《輕·功》造型記者會。對於日前有指港台高層向眾DJ以口頭下達十大歌手禁播名單，包括黃耀明、何韻詩、Rubberband、C AllStar、達明一派、Dear Jane、方皓玟、Serrini、謝安琪、許廷鏗。

鄭子誠直言並未受影響：「港台不嬲到俾好大自由度我，同埋我做自己嘅音樂節目，最緊要對播嘅音樂有感覺先，咁所以我播嘅歌全部都係陪住我長大嘅歌，咁所以一直以來播緊嘅歌，都係我最鍾意嘅歌。（黑名單嘅歌手唔會播？）基本上嗰啲歌手比較年青啲，對於我嚟講影響我唔大，同埋我堅持唔會因為播歌而播歌，而係我因為鍾意嗰首歌而播囉。（如果黑名單歌曲你喜歡又會唔會播？）暫時我睇唔到，因為我鍾意嘅歌都係喺80年代嘅歌，而且我會順住自己個心去播，係鍾意就會播。暫時會撇除名單嗰樣嘢先，只從節目中着想。」