東張西望｜女苦主付過萬按摩豐胸　皮下組織受損：半cup都冇升過

無論減肥抑或豐胸，都係唔少女士嘅畢生目標。昨晚(26日）播出嘅《東張西望》，事主區小姐喺IG見到按摩豐胸廣告，並聲稱可以一小時連升幾cup，於是到美容院接受價值432元嘅療程。「按摩過程我係不停標眼水，係非常痛。佢話痛係正常 ，我做完整個療程半cup都冇升過。」升cup失敗都算，區小姐最後仲被服說以10,320元買下15次豐胸療程。「職員話我單次唔包做機，只得人手按摩。」

由於按摩完之後，仍然感到胸部痛楚，區小姐於是去睇醫生：「我胸部有明顯瘀傷，檢查時我胸骨、胸口好痛，醫生診斷話我皮下組織受損，可能療程師按得太大力，皮下受損。」區小姐之後向美容院投訴並要求退款，但不得要領，又指診紙所寫嘅係一個病徵。之後《東張》主持人陪同區小姐到美容院了解事件，對方一開始表示「唔知發生咩事」、「負責人當然唔會返公司」，到最後要求以WhatsApp提出投訴，但《東張》等咗足足兩個星期，美容院方面都係已讀不回。

到底按摩是否能夠豐胸，節目訪問了江正本醫生，佢就話：「按摩會令血管擴張，繼面造成短暫水腫，呢個假象係會令乳房變大同結實咗。」