【七警案】阿雪開post討論：身為香港人，真係想知道大家睇法
七警案有判決，好多人都有不同意見，麥明詩在facebook亦發表了對這件事的看法，不過政治議題從來都是藝人死穴，因為一講，隨時連之後工作機會都冇，但陀緊三個月BB的孫慧雪唔驚，昨日在facebook出post 「大家對七警判決有何睇法？」其實標題相當中性，之後她亦第一個留言「我自己就覺得，先唔追究邊個對錯，只係睇到一個社會，警員同市民形成對立局面，對香港來講，真係唔係一件好事，事件繼續升溫，對香港嘅未來真係好擔心！」都係非常之有獨立思考的見解，而阿雪大部份的粉絲亦相當支持偶像，覺得阿雪好勇敢，但亦有部份激進粉絲相當不滿，更留言表示「跟進完呢個post會unfollow你，對阿雪你好失望呀！」雖然阿雪見到這位粉絲嬲豬，亦即刻氹番對方「唔好咁激動，大家都係著緊香港啫！你誤會咗我意思！」但不知這位粉絲有沒有息怒喇。亦有粉絲覺得阿雪這個topic太危險，不過阿雪就留言回覆「身為香港人，真係想知道大家睇法！」
事後《香港01》再以WhatsApp訪問阿雪，她覺得網民反應很正面，以後亦都會再講社會民生議題，她說：「我自己喺電話嘅群組都會討論，所以都想睇下我自己fan page嘅朋友睇法如何，開post之後啲朋友都叫我快啲刪除，(但你唔刪？)我好開心其實我page大部份人都好溫和咁討論，同發表意見，所以我唔捨得刪，(但都有少少偏激留言，之後仲敢唔敢？） 其實我都見到都會有人好偏激，所以我明白呢啲話題真係好敏感，不過我日後如果有啲忍唔住想講嘅嘢可能都會講，但真係會避忌啲，其實今次我都講得好避忌㗎！唔想俾人捉住你一兩句就係咁批評，始終同自己朋友先會大膽好多咁發表。」
其實藝人都有權發表對時事的意見，如果令到他們懼怕發言，驚發表看法會影響前途，要檢討的應該是這個社會，而不是這個敢發聲，敢發問的藝人。