任達華被追問17歲女兒拍拖即黑面：佢都係鍾意讀書多啲

任達華（華哥）今晚（3/1）現身香港電台出席《2022年節目巡禮》。提到「寶貝女」任晴佳（Ella）早前被拍得與少男同行，疑似有新戀情。華哥表示：「其實嗰日嗰啲男仔係同學嚟，而且我都識嘅，佢哋由細玩到大，咁啱有同學生日，佢哋一齊去買禮物慶祝，咁呢啲係正常社交嚟嘅。（囡囡都開始長大，畀唔畀佢拍拖？）最緊要讀書先啦。（有冇話幾多歲先俾拍拖？）叫佢睇多啲我同琦琦（太太）拍拖先。（如果囡囡揀男友，你都有要求呢？）佢而家都係鍾意讀書喎，佢冇呢樣嘢。」

被問到女兒有否分享少女心事，華哥開始表現得眉頭皺說：「其實我同佢都好多嘢講嘅，大家會講學校啲嘢，同講做運動同身邊朋友嘅事，咁樣係好事嚟。加上而家科技都好方便，就好似我離開咗香港咁耐，我哋經常都會視頻。（囡囡有否透露有男仔追？）冇喎，佢冇講過呢樣嘢，因為我哋互相都有信任嘅。」此時，華哥再被追問女兒拍拖會否呷醋？華哥終按耐不住黑面說：「佢冇喎！佢都係鍾意讀書多啲。」