【情人節】帶女友去AIA嘉年華驚見爛地 女神發脾氣巴打要求救
撰文：郭敏玲
出版：更新：
「就當普天之下情人節只得數秒......」單身真係好，不用為安排行程慶祝而絞盡腦汁。有拖拍的人，簡直好似玩Check Point咁，又要諗去邊好似諗task咁，去到又要安排下做乜，又要畀人劏到一驚血。過程最緊要夠細心，稍一不慎，情人節隨時變「懲人節」，另一半發脾氣就等於懲罰自己。就好似有位網友，可能眼見AIA嘉年華是著名拍拖聖地，加上過往有不少藝人都有去，就像去年賭王兒子何猷亨與陳瀅仍是情人時，曾與好友麥明詩及林作到嘉年華拍拖掟公仔，雖然是過去式，但總算Sweet過。於是網友亦好有心，有意帶女友到中環AIA嘉年華慶祝情人節，嬴返幾隻大公仔畀女友過下癮，點知......
可惜天時人和卻欠地利，到達目的地卻發現嘉年華瞬間變爛地，先知嘉年華前日已經結束。面對一場空，搞到女友發晒脾氣。無奈之下，事主上討論區開Post貼相求救，跪求女友原諒方法，見到張相的爛地，真係覺得悲傷。
此post一出，就引來其他網友強烈恥笑：「唔識做定Research嘅？」、「自己問題仲怪人」，還笑他「咁就慳左幾個鐘洗費」。事主深感無奈，即場文字直播，表示：「嬲嬲哋去坐M記算」，又話出動到請對方食生蠔都唔領情，真係陰公豬。幾經辛苦，女友發了大約兩小時脾氣，終於嬲完啦，其實嬲都係因為事主粗心大意啫！幸好大家和好如初，不過都要勸喻一眾男士，日後有什麼事都要做足準傭，始終無人想鬧交！