萬千星輝2021｜與丁子朗齊奪男飛躍　羅天宇：愛回家嗰五年好必要

《萬千星輝頒獎典禮2021》在今晚（2日）隆重舉行，「飛躍進步男藝員」最後六強分別是羅天宇、胡鴻鈞、丁子朗、馬貫東、黃庭鋒及林正峰，結果竟然出現兩位得獎者，分別是羅天宇同丁子朗！羅天宇在台上發表感言：「自己喺訓練班出嚟已經13年嘅時間啦，咁深深感受到作為演員，機會唔係必然嘅，由一套劇拍攝完成去到出街，再受到觀眾歡迎，係好難好難嘅一件事，所以要多謝每一位畀過機會我嘅監製，《愛回家》嗰五年係好必要嘅，如果唔係嗰五年我而家已經唔喺呢一行裏面。」最後他再感謝媽媽：「一個女人去凑大兩個小朋友係一啲都唔容易嘅，將來無論發生咩事都好，兩個小朋友都會喺你身邊照顧你，將來我會努力去做好呢件事。」

而丁子朗已經是第四度獲提名角逐「飛躍進步男藝員」，獨自留在香港打拼的他希望令家人放心：「我盡量令到屋企人唔好擔心，希望你哋會見到我嘅成績，我會繼續努力，我喺香港都有個好好嘅family，多謝大哥（森美）、Jinny（吳若希）同埋Mayanne（麥美恩），多謝你哋！」