王浩信拍《溏心風暴3》預被米雪狂摑：一定要破21巴紀錄！

唐文龍離開無綫十年，今次返娘家，就係拍《溏心風暴3》。久未出現在TVB，他笑言在電視城蕩失路，「連Canteen都唔記得喺邊，要人帶。」事隔十年回去拍劇，想必酬勞都好唔錯？唐文龍表示：「咁當然傾得啱，先會返嚟啦。不過當然好開心見返舊同事啦，大家頭先相處好開心。」至於返到TVB會否再拍多幾套？唐文龍就話：「睇下點先囉，到時再算。（人仔同港紙一齊賺？）咁人仔一定要賺㗎啦，再諗囉。」

今次再拍劇，唐文龍坦言有向監製提出特別要求，但未有明言有何要求：「始終我係飲呢度嘅奶大，今次難得有機會再合作，傾嘅過程中，只要都冇太大影響，其實彼此都好易話為嘅。」回到娘家，未有著落的唐文龍笑言：「返嚟就係搵女朋友囉。」至於點搵，唐文龍就話睇緣份。

另一邊廂，新加盟《溏心》系列的王浩信就話自己好chur，因為拍完《踩過界》，馬上就要拍《溏心3》，不過他直言有夏雨及李司棋做阿爸阿媽，覺得好榮幸，仲話：「知道佢哋係咁爆金句，真係好期待。」

而《溏心3》又係勾心鬥角，鬧交戲多，王浩信又擔唔擔今次又被人怒摑？他說：「暫時睇劇本又冇呢個需要住，但如果有我又唔擔心。」萬一真係有，王浩信就估最大機會被米雪姐摑：「之前都畀心姐（謝雪心）佢哋摑，如果畀米雪姐摑都開心嘅，我嘅集郵方式都比較特別。（想唔想破埋21巴紀錄？）一定要破埋紀錄！」