【情人節】鮮花唔夠小清新 胡子彤朱鑑然親手紮乾花冧女
一踏入2月，不論閣下是單身，或是「被私有化」，身邊朋友就開始有溫馨提示：「情人節就快到啦！」，準時過鬧鐘。單身人士除了keep住單身，其實已經冇你嘅事，但拍緊拖呢？就大件事喇，光是想送甚麼禮物，都夠晒頭痕啦。就好似由棒球員轉型成演員的胡子彤，最近入圍金像獎最佳新演員固然開心！但當下解決的就是情人節送甚麼禮物畀女朋友歐鎧淳，皆因他說：「今年情人節是我人生第一個有情人的情人節！」
一想起情人節，送花是常識吧！但鮮花終會有凋謝的一天，所以胡子彤就孖住好朋友朱鑑然，齊齊學整現時好hit的乾花束，keep得耐之餘，仲可以睇到誠意！去片喇～
攝影：符祥定
場地提供：CAMEL
兩位大男孩坐定定學紮花，聽落簡單，但做落有如朱仔所說：「要有藝術感。」不論花束的長度、顏色及編排等，都沒有特定的方程式，有Feel才是王道。不過朱鑑然與胡子彤藝術感就……還有進步空間嘅，胡子彤整整下更發覺花束好似金元寶！至於似唔似，就留給大家想像啦！不過只要有心機，對方就會感受到誠意，自然就會欣賞。
講起DIY手作，朱鑑然與胡子彤不約而同地表示曾經做過手作送給異性。雖然朱鑑然目前單身，但他透露以前自製過CD，唔通自彈自唱冧女？他說：「CD裡會放一些大家都喜歡的歌曲，因為這些歌代表著大家的回憶，對方聽到會想起相處時的快樂，是一隻很值得珍藏的CD。」雖然朱仔沒有錄過歌給對方聽，但送CD這個概念很特別，係有得諗嘅！
朱鑑然一邊紮花，一邊搞Gag；相反胡子彤為了整花束，非常專心，真的落足心機，事關他為情人節而苦惱。今年除了與女友歐鎧淳過的情人節，更是他人生第一個有伴侶的情人節，意義真係「都大大哋！」，他笑言會將手上的花送給「某人」（大家都知邊個啦）外，更會與女朋友食飯慶祝，問到為否親自下廚，胡子彤說：「聖誕節已經煮咗啦！應該唔會啦，我驚肚痛。」其後子彤話自己廚藝不錯，即是話會食到肚痛係因為……嘩！怕唔怕畀「某人」聽到，會被扭耳仔先！
排好乾花束之後，就來到最重要的環節－包裝。這個看似簡單的步驟，卻考倒兩位大男孩，包來包去都不能包出心水形狀。胡子彤都忍不住要幫手，最後都完成作品，總算收貨啦。所以話，都係收禮物最開心！此時，廣受男女歡迎的朱鑑然自爆曾收到番皂做禮物，「係女仔送嘅，係情侶番皂，寓意越洗越融啩。」而胡子彤咩都冇諗，手上整完乾花束之後，最希望另一半不會嫌棄禮物！就等大家留名等睇，「某人」會唔會嫌棄胡子彤份禮物啦！祝大家情人節快樂！