44歲江芷妮神隱15年終復出　親爆當年離開TVB原因：感覺好唔踏實

江芷妮（Cherie）今日現身尖沙咀出席香港開電視全新節目《有種老闆娘》錄影，提到早前與一大班好姊妹聚餐影大合照時，黃𨥈瑩手抱著B仔卻引起關注，有網民隨指她已婚生仔。Cherie笑言：「其實嗰個係我個仔。搞到𨥈瑩真係唔好意思，明白到好多人都好關心佢。（佢係咪好鍾意小朋友？）我諗佢都鍾意嘅，所以我一得閒就會多啲帶自己啲小朋友出去陪佢玩。（會唔會叫佢快啲生番個小朋友？）我會催吓佢。（咁即係佢而家有另一半？）咁呢樣嘢我就唔係好清楚喇，因為我哋冇傾呢啲，咁希望多啲聚會，帶小朋友畀佢玩亦一樣。」

被問及當年為何選擇退出娛樂圈？Cherie表示：「其實我份人危機感好重，做我哋呢行，忙起上嚟會冇得瞓，但得閒嘅時候就真係好得閒，感覺好唔踏實，成日處於好被動嘅狀態咁，所以當時選擇出去學多啲嘢去增值自己，得自己有兩手準備。（點睇無綫而家嘅走勢？）當然啦，每一個時代都有新人出嚟嘅，而我最近都有睇電視，亦都有睇《聲夢》，同友台嘅《全民造星》。而呢啲節目係可以令到好多新人湧現而加入娛樂圈，從而令到呢個行業可以百花齊放。」