姜晧文減30磅變型佬　獲提名金像獎：觀眾肯定最重要

黑仔86年參加亞視《電視先生選舉》入行，拍過無數劇集，但最有人記得是他做的綜藝節目，《開心主流派》、《歷史也瘋狂》，但最搶鏡一定是《香港亂噏》扮長毛。和其他亞視藝員不同，黑仔並沒有過檔無綫，他曾經在訪問表示無綫一直沒有找他，他亦不是一個主動的人，他說：「TVB冇人搵過我，同埋當時我喺亞視個個月都爆騷，有人過咗去問我過唔過去？我話唔喇，你話年少無知，少不更事又好，我喺亞視係好開心，當然都有捱過啦，頭一兩年入去真係試過幾個月無嘢撈，冇收入。」

 

離開亞視後黑仔加入電影圈，早幾年多演惡人，《毒戰》的黑哥，《証人》的劫匪，《逆戰》的老大，戲份未算多，但搶鏡。《激戰》在戲中飾演張家輝的師兄，令觀眾明白黑仔不單止可以做惡人，還可以做更多有層次的角色，之後在《五個小孩的校長》飾演盧強，戲中當一位好爸爸，雖然未有獲任何提名，但表現令人眼前一亮，黑仔感激遇過不少好導演，他說：「我要多謝晶哥，佢第一個搵我拍戲，搵我做反派，拍咗好多，我之前唔識佢㗎。跟住係杜sir，好記得《盲探》佢扮儍佬，由頭做一次畀我睇，之後再叫我做，當然要多謝林超賢啦，佢係第一個導演攞個劇本嚟同我研究角色，成個心路歷程係點。」
 

近年黑哥亦有不少女粉，全因減掉30磅脂肪，由肥佬變型佬，他說：「拍完《五個小孩的校長》我覺得自己好肥呀，我記得兩年前嘅9月1日，我開始減肥，用咗成個月時間戒油戒鹽再做gym，瘦返哂。之後我自拍一張畀君如，佢收到話呢個唔係黑仔，呢個係恭碩良嚟㗎？」上年《樹大招風》戲中飾演大輝，當大奸角季正雄（林家棟飾）好友，姜晧文獲得第23屆香港電影評論學會大獎最佳男演員提名，亦獲金屆金像獎最佳男配角提名。不過黑仔最想有套代表作，他說：「對我嚟講觀眾肯定最重要，有人可能因為睇張家輝、彭于晏入場睇《激戰》，想睇古仔、千嬅所以睇《五個小孩的校長》，我好想有一日，有人因為我黑仔，因為想睇姜晧文而買飛入場，我諗呢樣嘢每個演員都想，我唔知有冇呢日，但我會一路做一路等。」